ಸಿಪಿಆರ್ (CPR) ಆನಿ ಪ್ರಾಥಮಿಕ್ ಚಿಕಿತ್ಸೆಚಿ ತರಬೇತಿ-2026

ಕೆಎಂಸಿ ಆಸ್ಪತ್ರೆ ಆನಿ ಸಾಂ ಜುಜೆ ಕಾಮೆಲಿ ನೀರ್ಮಾರ್ಗ ಫಿರ್ಗಜೆಚ್ಯಾ ಭಲಾಯ್ಕೆ ಆನಿ ಸ್ತ್ರೀ ಆಯೊಗ್ ಆನಿ ಸ್ತ್ರೀ ಸಂಘಟನ್ ಹಾಂಚ್ಯಾ ಮುಖೇಲ್ಪಣಾರ್ ಸಿಪಿಆರ್ (CPR) ಆನಿ ಪ್ರಾಥಮಿಕ್ ಚಿಕಿತ್ಸೆಚಿ ತರಬೇತಿ

ಮಂಗ್ಳುರ್ಚ್ಯಾ ಕೆ.ಎಂ.ಸಿ ಆಸ್ಪತ್ರೆನ್ (ಡಾ. ಬಿ. ಆರ್. ಅಂಬೇಡ್ಕರ್ ಸರ್ಕಲ್), ನೀರ್ಮಾರ್ಗ, ಸಾಂ ಜುಜೆ ಕಾಮೆಲಿ ಫಿರ್ಗಜೆಚ್ಯಾ ಭಲಾಯ್ಕೆ ಆನಿ ಸ್ತ್ರೀ ಆಯೋಗ್ ಆನಿ ಸ್ತ್ರೀ ಸಂಘಟಾನಚ್ಯಾ ಸಹಕಾರಾನ್ ಸಿಪಿಆರ್ (CPR) ಆನಿ ವೈದ್ಯಕೀಯ್ ತುರ್ತು ಪರಿಸ್ಥಿತೆಚೆರ್ ಏಕ್ ಮಾಹೆತ್‌ಭರಿತ್ ತರ್ಭೆತಿ ಶಿಬಿರ್ ಯಶಸ್ವೆನ್ ಮಾಂಡುನ್ ಹಾಡ್ಲೆಂ. ಹೆಂ ಶಿಬಿರ್ 27 ಸಪ್ಟೆಂಬರ್ 2026 ವೆರ್ ಸ್ಥಳೀಯ್ ಇಸ್ಕೊಲಾಚ್ಯಾ ವಠಾರಾಂತ್ ಚಲ್ಲೆಂ.

ಸ್ತ್ರೀ ಸಂಘಟನಾಚ್ಯಾ ಸಾಂದ್ಯಾನಿಂ ಪ್ರಾರ್ಥನಾ ಗೀತಾ ದ್ವಾರಿ ಕಾರ್ಯಾಚಿ ಸುರ್ವಾತ್ ಕೆಲಿ. ಭಲಾಯ್ಕೆ ಆಯೋಗಾಚೊ ಸಾಂದೊ ಮಾನೆಸ್ತ್ ಫ್ರಾನ್ಸಿಸ್ ಗೊನ್ಸಾಲ್ವಿಸ್ ಹಾಣೆಂ ಕಾರ್ಯಾಚೆಂ ನಿರ್ವಹಣ್ ಕೆಲೆಂ. ಸ್ತ್ರೀ ಆಯೋಗಾಚಿ ಸಂಚಾಲಕಿ ಮಾನೆಸ್ತಿಣ್ ನಮಿತಾ ರೆಬೆಲ್ಲೊನ್ ಜಮ್ಲೆಲ್ಯಾ ಸರ್ವಾಂಕ್ ಸ್ವಾಗತ್ ಕೆಲೊ.

ಮಾನಾದಿಕ್ ಬಾಪ್ ಪಾವ್ಲ್ ಪಿಂಟೊ, ಫಿರ್ಗಜ್ ವಿಗಾರ್,

ಮಾನೆಸ್ತಿಣ್ ಉಷಾ ಫೆರ್ನಾಂಡಿಸ್, ಫಿರ್ಗಜ್ ಗೊವ್ಳಿಕ್ ಪರಿಷದೆಚಿ ಉಪಾಧ್ಯಕ್ಷ್ ಆನಿ ಸ್ತ್ರೀ ಸಂಘಟನಾಚಿ ಅಧ್ಯಕ್ಷ್,

ಮಾನೆಸ್ತ್ ಸುನಿಲ್ ಪಿರೇರಾ, ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಕಾರ್ಯದರ್ಶಿ,

ಮಾನೆಸ್ತ್ ಸುಜಿತ್ ಸಿಕ್ವೇರಾ, ಸರ್ವ್ ಆಯೋಗಾಂಚೊ ಸಂಯೋಜಕ್,

ಮಾನೆಸ್ತಿಣ್ ಗ್ರೆಟ್ಟಾ ರೊಡ್ರಿಗಸ್, ಭಲಾಯ್ಕೆ ಆಯೋಗಾಚೊ ಸಂಚಾಲಕ್

ಮಾನೆಸ್ತಿಣ್ ನಮಿತಾ ರೆಬೆಲ್ಲೊ, ಸ್ತ್ರೀ ಆಯೋಗಾಚೊ ಸಂಚಾಲಕ್

ವೆದಿಚೆರ್ ಹಾಜರ್ ಆಸ್‌ಲ್ಲೆ.

ಅಧ್ಯಕ್ಷೀಯ್ ಉಲವ್ಪ್ ದೀವ್ನ್, ಬಾಪ್ ಪಾವ್ಲ್ ಪಿಂಟೊನ್ ಮನ್ಶ್ಯಾಚ್ಯಾ ಜಿವಿತಾಚೆಂ ಮಹತ್ವ್ ವಿವರ್ಸುನ್, ಜೀವ್ ವಾಟಾವ್ನ್ ದವರ್ಚ್ಯಾಕ್ ಜಾಯ್ ಆಸ್‌ಲ್ಲಿ ಜಾಣ್ವಾಯ್ ಆಪ್ಣಾಂವ್ಚಿ ಆದುನಿಕ್ ಕಾಳಾರ್ ಚಡ್ ಗರ್ಜೆಚೆ ಮ್ಹಣ್ ಸಾಂಗ್ಲೆಂ.

ಕೆ.ಎಂ.ಸಿ ಆಸ್ಪತ್ರೆಚಿ ಡಾ. ಅರ್ಚನಾ ಹಿಣೆಂ ಮುಖೇಲ್ಪಣ್ ಘೆವ್ನ್, ಜಿವಿತ್ ವಾಟಾವ್ನ್ ದವರ್ಚಿ ಕಠಿಣ್ ಪ್ರಕ್ರಿಯಾ ಸಂಪ್ಯಾ , ಸ್ಪಷ್ಟ್ ಆನಿ ಪ್ರಾತ್ಯಕ್ಷಿಕ್ ರಿತಿರ್ ವಿವರ್ಸುನ್ ದಿಲಿ. ತಿಚ್ಯಾ ಹ್ಯಾ ವಿವರಣ್ಯಾ ವರ್ವಿಂ, ವೈದ್ಯಕೀಯ್ ಹಿನ್ನೆಲೆ ನಾತ್‌ಲ್ಲ್ಯಾ ಲೊಕಾಂಕೀ ತುರ್ತು ಪರಿಸ್ಥಿತೆರ್ ಧೈರ್ಯನ್ ಕಾಮ್ ಕರುಂಕ್ ಆತ್ಮ್‌ವಿಶ್ವಾಸ್ ಮೆಳ್ಳೊ. ವೆಳಾರ್ ಕಾಮ್ ಕೆಲ್ಯಾರ್ ಜೀವ್ ವಾಟಾವ್ಯೆತ್ ಆನಿ ಅಸಲಿ ಮಾಹೆತ್ ಜೊಡ್ಚಿ ದುಸ್ರ್ಯಾಂಕ್ ಕುಮಕ್ ಕರುಂಕ್ ಪಯ್ಲೆಂ ಮೆಟ್ ಮ್ಹಣ್ ತಿಣೆಂ ಖಚಿತಾಯೆನ್ ಸಾಂಗ್ಲೆಂ.

ಸಾಮಾನ್ಯ್ ಸಿಪಿಆರ್ (CPR) ಸೊಡ್ನ್, ಹೆರ್ ಗಂಭೀರ್ ವೈದ್ಯಕೀಯ್ ತುರ್ತು ಪರಿಸ್ಥಿತೆಚೆರ್ ಕಶೆಂ ಶಾಂತಾಯೆನ್ ಆನಿ ಸಾರ್ಕ್ಯಾ ರಿತಿರ್ ಸ್ಪಂದನ್ ಕರ್ಯೆತ್ ಮ್ಹಳ್ಳ್ಯಾಚೆರ್ ತರ್ಭೆತಿ ದಿಲಿ,

ತ್ಯಾ ಪಯ್ಕಿ:

. ವಿಕಾಳ್ ಜಿವ್ದಳ್ ಚಾಬ್‌ಲ್ಲೆಂ (Snake bites)

* ಸ್ಟ್ರೋಕ್ ವಾ ಲಕ್ವಾ/ಆರ್ (Strokes)

* ಗಳ್ಯಾಕ್ ಖಾಣ್ ವ ಉದಾಕ್ ಶಿರ್ಕೊನ್ ಉಸ್ವಾಸ್ ಬಂದ್ ಜಾಂವ್ಚೆಂ (Choking)

* ಕುಡಿಚೊ ಅವಯವ್ ಕಾತರ್ಚೆ (Amputations)

ಹ್ಯಾ ಪ್ರಾತ್ಯಕ್ಷಿಕೆ ವೆಳಾರ್ ಕೆ.ಎಂ.ಸಿ ಆಸ್ಪತ್ರೆಚೊ ಮಾನೆಸ್ತ್ ರೊಮೇಶ್ ಹಾಣೆಂ ಡಾ. ಅರ್ಚನಾಕ್ ಕುಮಕ್ ಕೆಲಿ.

ಹ್ಯಾ ಶಿಬಿರಾಕ್ ಸುಮಾರ್ 170 ಜಣಾಂನಿ ಉಮೆದಿನ್ ವಾಂಟೊ ಘೆವ್ನ್ ಜಣ್ವಾಯ್ ಅಪ್ಣಾಯ್ಲಿ. ಶಿಬಿರಾಚ್ಯಾ ಅಖ್ರೇಕ್, ಆಸ್ಪತ್ರೆ ತರ್ಫೆನ್ ಸರ್ಟಿಫಿಕೇಟ್, ಸಿಪಿಆರ್ (CPR) ವಿಶಿಂ ಸವಿಸ್ತಾರ್ ಮಾಹೆತ್ ದಿವ್ಪಿ ಪುಸ್ತಕಾಂ ಆನಿ ಆಸ್ಪತ್ರೆಚ್ಯಾ ಆಂಬುಲೆನ್ಸಾಚೊ ಸಂಪರ್ಕ್ ನಂಬರ್ ಆಸ್‌ಲ್ಲೆ ರೆಫ್ರಿಜರೇಟರ್ ಮ್ಯಾಗ್ನೆಟ್ ವಾಂಟ್ಲೆ.

ಫಿರ್ಗಜೆ ತರ್ಫೆನ್ ಸಂಪನ್ಮೂಲ್ ವ್ಯಕ್ತಿಂಕ್ ಉಪ್ಕಾರ್ ಆಟವ್ನ್ ಫುಲಾಂಚಿಂ ಝಡಾಂ ಆನಿ ಕಾಣಿಕ್ ದಿಲಿ, ತಶೆಂಚ್ ಡಾ. ಅರ್ಚನಾನ್ ಫಿರ್ಗಜೆಕ್ ಧರ್ಮಾರ್ಥ್ ಏಕ್ ಫಸ್ಟ್-ಏಡ್ (first-aid) ಕಿಟ್ ದಿಲೆಂ. ಭಲಾಯ್ಕೆ ಆಯೋಗಾಚೊ ಸಾಂದೊ ಮಾನೆಸ್ತಿಣ್ ಶರಲ್ ಪಿರೇರಾನ್ ಧನ್ಯವಾದ್ ಪಾಟಯ್ಲೆ, ಆನಿ ಶಿಬಿರಾಚ್ಯಾ ಅಖೇರಿಕ್ ಹಾಜರ್ ಆಸ್‌ಲ್ಲ್ಯಾ ಸರ್ವಾಂಕ್ ಕಾಫಿ ಫಳಾರ್ ವಾಂಟ್ಲೆ.