NEWS

ಸಮುದಾಯ್ ದೀಸ್ ಆಚರಣ್

ಕಾಮೆಲಿ ಸಾಂ ಜುಜೆ ಫಿರ್ಗಜೆಂತ್ ಮೇ 1ವೆರ್ ಸಮುದಾಯ್ ದೀಸ್ 4.30 ವರಾರ್ ಸಂಭ್ರಮಿಕ್ ಮಿಸಾಸವೆಂ  ವ್ಹಡಾ ದಬಾಜಾನ್ ಆಚರಣ್ ಕೆಲೊ. ಪ್ರಧಾನ್ ಯಾಜಕ್ ಜಾವ್ನ್ ಕೊರ್ಡೆಲ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಕ್ಲಿಫರ್ಡ್ ಫೆರ್ನಾಂಡಿಸ್ ಹಾಜರ್ ಆಸೊನ್ ಸಮುದಾಯಾಂತ್ ಎಕಾಮೆಕಾ ಲಾಗಿಂ ಸಂಬಂಧ್ ದವರ್ಚೊ ಏಕ್ ಥರಾಚೆಂ ಮಾಗ್ಣೆಂ, ಸಮುದಾಯ್ ಬಾಂದುನ್ ಹಾಡುಂಕ್ ಬರೆಂ ಉಲವ್ಣೆಂ, ಉದಾರ್‌ಪಣ್ ಆನಿ ಮುಕೇಲ್ಪಣ್ ಗರ್ಜೆಚೆಂ ಮ್ಹಣ್ ಘಣ್ಗಣಿತ್ ಶೆರ್ಮಾಂವ್ ದಿಲೊ.

ಮಿಸಾ ಉಪ್ರಾಂತ್ 6.00 ವರಾರ್ ಪವಿತ್ರ್ ಪುಸ್ತಕ್ ಪುರ್ಶಾಂವಾರ್ ಹಾಡ್ನ್ ಮಾನ್ ಕರ್ಚೆದ್ವಾರಿಂ ವೆದಿ ಕಾರ್ಯೆಂ ಸುರ್ವಾತ್ಲೆಂ. ಭುರ್ಗ್ಯಾಂನಿ ಸ್ವಾಗತ್ ನೃತ್ಯಾದ್ವಾರಿಂ ದೆವಾಕ್ ಮಹಿಮಾ ಪಾಟಯ್ಲಿಂ. ಲ್ಹಾನ್ ಕ್ರಿಸ್ತಾಂವ್ ಸಮುದಾಯಾಚಿ ಸಂಚಾಲಕ್ ಶ್ರೀಮತಿ ಸಬಿತಾ ಸಲ್ಡಾನ್ಹಾನ್ ಮಾನಾಚೆ ಸಯ್ರೆ ಫಿರ್ಗಜ್ ವಿಗಾರ್ ಮಾ| ಬಾ| ಪಾವ್ಲ್ ಪಿಂಟೊ, ಮಾ| ಬಾ| ಕ್ಲಿಫರ್ಡ್ ಫೆರ್ನಾಂಡಿಸ್, ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಶ್ರೀ ಸಂದೀಪ್ ಮಿಸ್ಕಿತ್, ಕಾರ್ಯದರ್ಶಿ ಶ್ರೀಮತಿ ಝೀಟಾ ಉಷಾ ಫೆರ್ನಾಂಡಿಸ್ ಆನಿ ಸರ್ವ್ ಆಯೋಗಾಂಚೊ ಸಂಯೋಜಕ್ ಶ್ರೀ ಮಾವ್ರಿಸ್ ರೇಂಜಲ್ ಹಾಂಕಾಂ ವೆದಿಕ್ ಆಪವ್ನ್ ಹಾಡ್ಲೆಂ.

ಮಾ| ಬಾ| ಕ್ಲಿಫರ್ಡ್ ಫೆರ್ನಾಂಡಿಸ್ ಹಾಂಣಿ ಆಪ್ಲ್ಯಾ ಉಲವ್ಪಾಂತ್ ಭುರ್‍ಗ್ಯಾಂನಿ ಶಿಕಾಜೆ, ವ್ಹಡಿಲಾಂನಿ ಮ್ಹಿನತ್ ಕಾಡಿಜೆ ತವಳ್ ಮುಕ್ಲೆಂ ಜಿವಿತ್ ಸಲೀಸ್ ಜಾತಾ ತಶೆಂಚ್ ಅತ್ಮಿಕ್ ಆನಿ ಆರ್ಥಿಕ್ ವಾಡಾವಳ್ ಸಾಂಗಾತಾ ಗೆಲ್ಯಾರ್ ಮಾತ್ರ್ ಸಮುದಾಯ್ ಬಳ್ವಂತ್ ಮ್ಹಣ್ ಸಗ್ಳ್ಯಾ ಫಿರ್ಗಜ್ ಕುಟ್ಮಾಚೆರ್ ಬೆಸಾಂವಾಂ ಮಾಗೊನ್ ಸಮುದಾಯ್ ದಿಸಾಚೆ ಉಲ್ಲಾಸ್ ಪಾಟಯ್ಲೆ.

ಉಪ್ರಾಂತ್ ದೊತೊರ್ ಸನದ್ ಆಪ್ಣಾಯಿಲ್ಲ್ಯಾ ಪಾವ್ಲ್ ಡಿಸೋಜಾ, ಕೆನಿತ್ ಲೋಬೊ, ರೋಶ್ನಿ ಪಿರೇರಾ ಆನಿ ವೃತ್ತಿ ಶೆತಾಂತ್ ಸಾಧನ್ ಕೆಲ್ಲ್ಯಾ ವಿಕ್ಟರ್ ಎಡ್ವರ್ಡ್ ಡಿಸೋಜಾ ಹಾಂಕಾಂ ಮಾನಾಚ್ಯಾ ಸಯ್ರ್ಯಾಂನಿ ಸನ್ಮಾನ್ ಕೆಲೊ. ಲ್ಹಾ. ಕ್ರಿಸ್ತಾಂವ್ ಸಮುದಾಯ್ ಸಾಂದೊ ಶ್ರೀಮತಿ ಗ್ರೆಟ್ಟಾ ವಾಸ್ ಹಿಣೆಂ ಸನ್ಮಾನಿತಾಂಚಿ ವಳಕ್ ಕರ್ನ್ ದಿಲಿ.

ಫಿರ್ಗಜ್ ವಿಗಾರ್ ಮಾ| ಬಾ| ಪಾವ್ಲ್ ಪಿಂಟೊ ಹಾಂಣಿ ಆಪ್ಲ್ಯಾ ಸಂದೇಶಾಂತ್ ದೆವಾಥಂಯ್ ಸಂಬಂಧ್ ಅಸೊಂದಿ, ಪೆಲ್ಯಾಥಂಯ್ ಸಂಬಂಧ್ ಬಾಂದುನ್ ಹಾಡುಂಕ್ ಹೆಂ ಆಚರಣ್ ಕಾರಣ್ ಜಾಂವ್ದಿ, ಸಮುದಾಯಾಂತ್ ನಿರಂತರ್ ವಾವುರ್ಚಿ ಉರ್ಬಾ ವಾಡುಂದಿ ಮ್ಹಳ್ಳೊ ಉಲೊ ದಿಲೊ.

ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಶ್ರೀ ಸಂದೀಪ್ ಮಿಸ್ಕಿತಾನ್ ಸ್ವಾಗತ್ ಕೆಲೊ, ಕಾರ್ಯದರ್ಶಿ ಶ್ರೀಮತಿ ಉಷಾ ಫೆರ್ನಾಂಡಿಸಾನ್ ದಾನಿಂಚಿಂ ನಾಂವಾಂ ವಾಚುನ್ ಸಾಂಗ್ಲಿಂ. ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಸಂಚಾಲಕ್ ಶ್ರೀಮತಿ ಸಬಿತಾ ಸಲ್ಡಾನ್ಹಾನ್ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ. ಆಸ್ಟನ್ ಡಿಸೋಜಾನ್ ವೆದಿ ಕಾರ್ಯೆಂ ಚಲವ್ನ್ ವೆಲೆಂ.

ಉಪ್ರಾಂತ್ ವಾಡ್ಯಾಗಾರಾಂಥಾವ್ನ್ ಸಾಂಸ್ಕೃತಿಕ್ ಕಾರ್ಯೆಂ ಚಲ್ಲೆಂ. ಗ್ರೀಶ್ಮಾ ಸಲ್ಡಾನ್ಹಾನ್ ಕಾರ್ಯೆಂ ಚಲಯ್ಲೆಂ. ಫಿರ್ಗಜ್‌ಗಾರಾಂನಿ ತಯಾರ್ ಕೆಲ್ಲ್ಯಾ ಜೆವ್ಣಾಚೆರ್ ವಿಗಾರ್ ಬಾಪಾಂನಿ ಆಶಿರ್ವಾದ್ ಮಾಗ್ತೆಚ್ ರುಚಿಕ್ ಜೆವ್ಣಾದ್ವಾರಿಂ ಕಾರ್ಯೆಂ ಸಂಪ್ಲೆಂ.

Click here:  👉🏻https://www.daijiworld.com/news/newsDisplay?newsID=1188288