NEWS

ಕೊಂಕಣಿ ಮಾನ್ಯತಾ ದಿವಸ್ ಆಚರಣ್

ಮಾನೆಸ್ತ್ ಅರುಣ್‌ರಾಜ್ ಲುದ್ರಿಗಾನ್ ’ನಮಾನ್ ತುಕಾ ಮೊಗಾಳ್ ಕೊಂಕಣ್ ಮಾತಾ’ ಸ್ಲೊಗಾನಾಚಿ ಕೊವ್ಳಿ ಉಗ್ತಾವಣ್ ಕರ‍್ನ್ ಆಪ್ಲ್ಯಾ ಸಂದೇಶಾಂತ್ ಆಮ್ಚ್ಯಾ ಕೊಂಕ್ಣಿ ಭಾಶೆಕ್ ಭಾರತಾಚ್ಯಾ ಸಂವಿಧಾನಾಂತ್ 1992 ಇಸ್ವೆಚ್ಯಾ ಅಗೋಸ್ತ್ 20 ತಾರಿಕೆರ್ ಆಟ್ವ್ಯಾ ವೊಳೆರಿಂತ್ ಮಾನ್ಯತಾ ಮೆಳ್ಳೆಲೆವಿಶಿಂ ವಿವರುನ್, ಆಮಿ ಆಸಲ್ಯಾಚ್ ಸ್ಪಿರಿತಾನ್ ಮುಂದರುನ್ ಕೊಂಕ್ಣಿ ಭಾಸ್ ಉರಯ್ಜೆ ತರ್ ಘರಾಂನಿ ಕೊಂಕ್ಣಿ ಉಲೊಂವ್ಕ್ ಉಲೊ ದಿಲೊ. ವಿಗಾರ್ ಬಾಪಾಂನಿ ಆಪ್ಲ್ಯಾ ಸಂದೇಶಾಂತ್ 25 ವರ‍್ಸಾಂ ಆದಿಂ ವಾಲೆನ್ಸಿಯಾ ಫಿರ‍್ಗಜೆಚೊ ವಿಗಾರ್ ಜಾವ್ನ್ ಆಸ್ತಾನಾ ಪಯ್ಲೆ ಪಾವ್ಟಿಂ ಫಿರ್ಗಜೆಂತ್ ಕೊಂಕ್ಣಿ ಮಾನ್ಯತಾ ದಿವಸ್ ಆಚರಣಾಚಿ ಸುರ‍್ವಾತ್ ಕೆಲ್ಲಿ ಆನಿ ಆಜ್ ಸಗ್ಳ್ಯಾ ದಿಯೆಸೆಜಿಂತ್ ತೊ ದೀಸ್ ಆಚರಣ್ ಕರ‍್ತಾತ್. ಆಮಿ ಕೊಂಕ್ಣಿ ಪರ್ಜೆನ್ ಆಮ್ಚಿ ಕೊಂಕ್ಣಿ ಭಾಸ್ ಮುಕ್ಲ್ಯಾ ಪಿಳ್ಗೆಕ್ ಪಾವಯ್ಜೆ, ಉರಯ್ಜೆ ಆನಿ ವಾಡಯ್ಜೆ ತರ್ ಆಮಿ ಘರಾಂನಿ ಜಾತಾ ತಿತ್ಲೆಂ ಕೊಂಕ್ಣಿ ಉಲವ್ನ್ ಕೊಂಕ್ಣಿ ಭಾಶೆಕ್ ಮಾನ್ಯತಾ ದೀಜೆ ಮ್ಹಣ್ ಸಾಂಗೊನ್ ಫಿರ್ಗಜ್‌ಗಾರಾಂಕ್ ತ್ಯಾ ದಿಸಾಚೆ ಅಭಿನಂದನ್ ಪಾಟಯ್ಲೆ. 

16 ವಾಡ್ಯಾಚ್ಯಾಂನಿ 14 ಪಂಗಡ್ ಜಾವ್ನ್ ಕೊಂಕಣಿ ಮಾನ್ಯತಾ ದಿಸಾಕ್ ಲಗ್ತಿ ಜಾಲ್ಲಿಂ ಕೊಂಕ್ಣಿಂ ಪದಾಂ, ಮಾಂಡೊ, ನಾಚ್, ಕೊಂಕ್ಣಿ ನಾಟ್ಕುಳೆ ಪ್ರದರ‍್ಶನ್ ಕರ‍್ನ್ ಸರ್ವಾಂಚಿಂ ಮನಾಂ ಧಾದೊಶಿ ಕೆಲಿಂ. ಉಪಾಧ್ಯಕ್ಷ್ ಮಾನೆಸ್ತ್ ಸಂದೀಪ್ ಮಿಸ್ಕಿತಾನ್ ಸ್ವಾಗತ್ ಕೆಲೆಂ. ಮಾನೆಸ್ತಿಣ್ ಸವಿತಾ ಪಿರೇರಾನ್ ಕಾರ‍್ಯೆಂ ಚಲಯ್ಲೆಂ. ಲ್ಹಾನ್ ಕ್ರಿಸ್ತಾಂವ್ ಸಮುದಾಯಾಚಿ ಸಂಚಾಲಕ್ ಮಾನೆಸ್ತಿಣ್ ಶಬಿತಾ ಸಲ್ಡಾನ್ಹಾನ್ ವಂದಿಲೆಂ. 

16 ವಾಡ್ಯಾಚ್ಯಾಂನಿ ತಾಂಚ್ಯಾ ತಾಂಚ್ಯಾ ವಾಡ್ಯಾಂತ್ ಸಾಂಗಾತಾ ಮೆಳೊನ್ ತಯಾರ್ ಕೆಲ್ಲೆ ಪತ್ರಾಡೆ ಖಾಣ್ ಸೆಂವ್ಚೆದ್ವಾರಿಂ ತ್ಯಾ ದಿಸಾಚೆಂ ಕಾರ‍್ಯೆಂ ಸಂಪಯ್ಲೆಂ.