NEWS

ನಿತ್ಯಾಧಾರ್ ಮಾಯ್ ವಾಡೊ: ವಾಡ್ಯಾ ದೀಸ್ ಆಚರಣ್ 

ಜೂನ್ ಮಹಿನ್ಯಾಚಾ 30 ತಾರಿಕೆರ್ ನಿತ್ಯಾಧಾರ್ ಮಾಯೆಚಾ ವಾಡ್ಯಾಗಾರಾಂನಿ ವಾಡ್ಯಾಚೊ ದೀಸ್ ಭೋವ್ ಗದ್ದಳಾಯೆನ್ ಆಚರಣ್ ಕೆಲೊ. ಸಕಾಳಿಂ ಪವಿತ್ರ್ ಮಿಸಾಚಾ ಬಲಿದಾನಾಂ  ಮುಖಾಂತ್ರ್ ನಿತ್ಯಾದಾರ್ ಮಾಯೆ ಮುಖಾಂತ್ರ್ ತ್ರಿಏಕ್ ದೆವಾನ್ ವಾಡ್ಯಾಂತ್ ವೊತ್‌ಲ್ಲ್ಯಾ ಸರ್ವ್ ಆಶೀರ್ವಾದಾಂ ಖಾತಿರ್ ಅರ್ಗಾಂ ಪಾಟಯ್ಲಿಂ. 

ಸಾಂಜೆರ್ 5.30 ವರಾರ್ ಶ್ರೀ ಎಡ್ಮಂಡ್ ಸಲ್ಡಾನ್ಹಾಚಾ ಘರಾ ವಾಡ್ಯಾಗಾರಾಂಚೆಂ ಸಹಮಿಲನ್ ಮಾಗ್ಣ್ಯಾಸವೆಂ ಆರಂಭ್ ಕೆಲೆಂ. ಉಪ್ರಾಂತ್ ಸಮುದಾಯೆಚೊ ಕೇಂದ್ರ್ ಜಾವ್ನಾಸ್ಚ್ಯಾ ಪವಿತ್ರ್ ಪುಸ್ತಕಾಕ್ ಗುರ್ಕಾರ್ ಆನಿ ವಾಡ್ಯಾ ಸಮಿತಿಚಾ ಸಾಂದ್ಯಾಂನಿ ವಾತಿ ಆನಿ ಫುಲಾಂ ಸವೆಂ ಪುರ್ಶಾಂವಾಂರ್ ಹಾಡ್ನ್ ಮಾಗ್ಣ್ಯಾಸವೆಂ ಕಾರ್ಯೆಂ ಆರಂಭ್ ಕೆಲೆಂ. ವಿಗಾರ್ ಬಾಪ್ ಮಾ. ಬಾಪ್ ಪಾವ್ಲ್ ಪಿಂಟೊ, ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಅನಿ ವಾಡ್ಯಾಚೊ ಗುರ್ಕಾರ್ ಶ್ರೀ ಸಂದೀಪ್ ಮಿಸ್ಕಿತ್, ಕಾರ್ಯದರ್ಶಿ ಶ್ರೀಮತಿ ಉಷಾ ಫೆರ್ನಾಂಡಿಸ್, 21 ಆಯೋಗಾಚೊ ಸಂಯೋಜಕ್ ಶ್ರೀ ಮಾವ್ರಿಸ್ ರೇಂಜಲ್, ಧರ್ಮ್ ಭಯ್ಣಿಂ, ಲ್ಹಾನ್ ಕ್ರಿಸ್ತಾಂವ್ ಕೇಂದ್ರಿಯ್ ಸಮಿತಿಚಿ ಸಂಚಾಲಕ್ ಆನಿ ವಾಡ್ಯಾಚಿ ಕಾರ್ಯದರ್ಶಿ ಶ್ರೀಮತಿ ಶಬಿತ ಸಲ್ಡಾನ್ಹಾ,  ಇತರ್ ವಾಡ್ಯಾಚೆ ಗುರ್ಕಾರ್, ಲ್ಹಾನ್ ಕ್ರಿಸ್ತಾಂವ್ ಕೇಂದ್ರಿಯ್ ಸಮಿತಿ ತರ್ಪೆನ್ ಸಂಪನ್ಮೂಳ್ ವ್ಯಕ್ತಿ ಜಾವ್ನ್ ಶ್ರೀಮತಿ ಗ್ರೆಟ್ಟಾ ವಾಸ್ ಹಾಜರ್ ಆಸ್‌ಲ್ಲಿ.  ಜಮ್ಲೆಲ್ಲ್ಯಾ ಸರ್ವಾಂಕ್ ಗುರ್ಕಾರ್ ಶ್ರೀ ಸಂದೀಪ್ ಮಿಸ್ಕಿತಾನ್ ಪಾನ್‌ಪೋಡ್ ಉದ್ಕಾನ್ ಸ್ವಾಗತ್ ಕೆಲೊ. ವಾಡ್ಯಾಚಿ ಕಾರ್ಯದರ್ಶಿ ಶ್ರೀಮತಿ ಶಬಿತ ಸಲ್ಡಾನ್ಹಾನ್ ಪಾಟ್ಲ್ಯಾ ವರ್ಸಾಂಚಿ ವರ್ದಿ ವಾಚುನ್ ಸಾಂಗ್ಲಿ. ವಾಡ್ಯಾಂತ್ಲ್ಯಾ ಚಾರ್ ಪ್ರತಿಭಾವಂತ್ ಭುರ್ಗ್ಯಾಂಕ್ (ರೋಹಕ್ ಸಲ್ಡಾನ್ಹಾ, ಪ್ರೆಸ್ಟನ್ ಸಲ್ಡಾನ್ಹ, ಸ್ವಿನಿ ಸಲ್ಡಾನ್ಹ, ಸ್ಯಾನ್ ಸನ್ ಮಿಸ್ಕಿತ್) ಹಾಂಕಾಂ ಪ್ರತಿಭಾ ಪುರಸ್ಕಾರ್ ದೀವ್ನ್ ಮಾನ್ ಕೆಲೊ. ಸಂಪನ್ಮುಲ್ ವ್ಯಕ್ತಿ ಶ್ರೀಮತಿ ಗ್ರೆಟ್ಟಾ ವಾಸಾನ್ "ವಾಡ್ಯಾಂತ್ ಆಸ್‌ಲ್ಲೆಂ ಉಣೆಂಪಣ್ ಪಯ್ಸ್ ದವರ‍್ನ್ ವಾಡೊ ಕಸೊ ಜಿವಾಳ್ ದವರ‍್ಯೆತ್" ಮ್ಹಳ್ಳೆವಿಶಿಂ ಸಂದೇಶ್ ದಿಲೊ. ವಿಗಾರ್ ಬಾಪಾಂನಿ ಅಪ್ಲ್ಯಾ ಸಂದೇಶಾಂತ್ "ವಾಡ್ಯಾಂತ್ ಆಮಿ ಸಾಂಗಾಂತಾ ಮೆಳ್ತಾನಾ ದೆವಾಚಾ ಉತ್ರಾಂದ್ವಾರಿಂ ಆಮ್ಚೆಥಂಯ್ ಉರ್ಬಾ ಅನಿ ಪ್ರೇರಣ್ ಮೆಳ್ತಾ, ದೆವಾಚೆಂ ಉತಾರ್ ವಾಂಟುನ್ ಘೆತ್‌ಲ್ಲೆ ವರ್ವಿಂ ಕ್ರಿಸ್ತಿ ಮುಖೇಲ್ಪಣ್ ರುತಾ ಜಾತಾ".  ವಾಡ್ಯಾಂತ್ ಆನಿಕೀ ಮುಖೇಲ್ಪಣ್ ಚಡುನ್, ವಾಡೊ ಬಳ್ವಂತ್ ದವರುಂಕ್ ಉಲೊ ದಿಲೊ. 

 ವಿವಿಧ್ ಖೆಳ್ ಮಾಂಡುನ್ ಹಾಡುನ್ ಜಿಕ್ಲೆಲ್ಲ್ಯಾಂಕ್ ಇನಾಮಾಂ ವಾಂಟ್ಲಿ. ಉಪ್ರಾಂತ್ ವಾಡ್ಯಾಂತ್ಲ್ಯಾ ಲ್ಹಾನಾಂನಿ ತಶೆಂ ವ್ಹಡಾಂನಿ ಸಾಂಗಾತಾ ಮೆಳೊನ್ ಭೋವ್ ಅಪುರ್ಬಾಯೆಚೆ ಮನೋರಂಜನ್ ಕಾರ್ಯೆಂ ಪ್ರದರ್ಶಿತ್ ಕೆಲೆಂ. ಶ್ರೀಮತಿ ಶೆರಿನ್ ಡಿಕುನ್ಹಾನ್ ಕಾರ್ಯೆಂ ನಿರ್ವಹಣ್ ಕೆಲೆಂ. ಶ್ರೀಮತಿ ಜ್ಯೋತಿ ರೆಬೆಲ್ಲೊನ್ ಧನ್ಯಾವಾದ್ ಪಾಟಯ್ಲೆ. ನಿಮಾಣೆಂ ಶ್ರೀ ರವಿ ಸಲ್ಡಾನ್ಹಾನ್ ಜೆವ್ಣಾಚೆರ್ ಆಶೀರ್ವಾದ್ ಮಾಗ್ಲೊ.  ವಾಡ್ಯಾಗಾರಾಂನಿ ತಶೆಂಚ್ ಹಾಜರ್ ಆಸ್ಲ್ಯಾ ಸರ್ವಾಂನಿ ಸಾಂಗಾಂತಾ ಮೆಳೊನ್ ಜೆವಾಣ್ ಸ್ವೀಕಾರ್ ಕೆಲೆಂ. ಹ್ಯಾ ಆಚರಣಾಕ್ ವಾಡ್ಯಾಚಾ 32 ಕುಟ್ಮಾಂ ಪೈಕಿ 24 ಕುಟ್ಮಾಚಿಂ ಹಾಜರ್ ಆಸ್‌ಲ್ಲಿಂ. ಸುಮಾರ್ 80 ವಾಡ್ಯಾಗಾರಾಂ ಆನಿ  ಸಯ್ರ್ಯಾಂ ಸಾಂಗಾತಾ 100 ಜಣಾಂ ಹಾಜರ್ ಆಸೊನ್ ಸಂತೊಸ್ ಭೊಗ್ಲೊ.