NEWS

ಭಾರತೀಯ್ ಕಥೊಲಿಕ್ ಯುವ ಸಂಚಾಲನ್ ನಿರ್ಮಾರ್ ಘಟಕಾನ್ 2 ನವೆಂಬರ್ 2025ವೆರ್, ದೊನ್ಪಾರಾಂ 3 ವರಾರ್ ಸರ್ವ್ ಫಿರ್ಗಜ್ಗಾರಾಂಕ್ ವಾಡ್ಯಾವಾರ್ ಗಾಯನ್ ಸ್ಪರ್ಧೊ ಮಾಂಡುನ್ ಹಾಡ್ಲೊ. ಸ್ಪರ್ಧ್ಯಾಂತ್ ಸುಮಾರ್ 75 ಸ್ಪರ್ಧಿಕಾಂನಿ ಎಕೊಡೆಂ ಗಾಯನಾಂತ್, 34 ಸ್ಪರ್ಧಿಕಾಂನಿ ದೊಡೆಂ ಗಾಯನಾಂತ್ ತಶೆಂಚ್ 10 ಪಂಗ್ಡಾನಿಂ ಭಾಗ್ ಘೆತ್ಲೆಂ.

ಪ್ರಾರ್ಥನ್ ಗೀತಾ ದ್ವಾರಿ ಕಾರ್ಯೆo ಆರಂಭ್ ಕೆಲೆಂ. ಉಪ್ರಾಂತ್ ಜೆಲ್ರೊಯ್ ವಾಸ್, ಸಾನುರಾ ಡಿಸೋಜಾ, ಆನಿ ಡಿಯೊನಾ ಡಿಸೋಜಾ ಹಾಣಿಂ ವ್ಹರಯ್ನಾರಾಂಚಿ ವಳಕ್ ಕರುನ್ ದಿಲಿ. ಕುಮಾರಿ ವೆಲಿಟಾ ಲೊಬೊ, ಶ್ರೀ ಜೆಸನ್ ಲೊಬೊ, ಶ್ರೀ ಡೆನ್ಜಿಲ್ ಪಿರೇರಾ ಆನಿ ಕುಮಾರಿ ಸಿಮೊನ್ ಮೊಂತೆರೊ ವ್ಹರಯ್ನಾರ್ ಜಾವ್ನಾಸ್ಲೆ. ಉಪ್ರಾಂತ್ ವಿವಿಧ್ ವಿಭಾಗಾಂನಿ ಗಾಯನ್ ಸ್ಪರ್ಧೊ ಪ್ರಾರಂಭ್ ಕೆಲೊ. ಕಾರ್ಯಾ ವೆಳಾರ್ ಮಾ| ಬಾ| ರೊಕಿ ಡಿಕುನ್ಹಾ ಹಾಜರ್ ಆಸೊನ್ ಸರ‍್ವ್ ಸ್ಪರ್ಧಿಕಾಂಕ್ ಬರೆಂ ಮಾಗೊನ್ ಕೊಂಕ್ಣಿ ನಾಟಕ್ ಸಭಾ ಮಾಂಡುನ್ ಹಾಡ್ಚ್ಯಾ ಗಾಯನ್ ಸ್ಪರ್ಧ್ಯಾಂನಿ ಭಾಗ್ ಘೆಂವ್ಕ್ ಉಲೊ ದಿಲೊ

ಸಮರೋಪ್ ಕಾರ್ಯಾಕ್ ವೆದಿರ್ ಫಿರ್ಗಜ್ ವಿಗಾರ್ ಮಾ| ಬಾ| ಪಾವ್ಲ್ ಪಿಂಟೊ, ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಶ್ರೀ ಸಂದೀಪ್ ಮಿಸ್ಕಿತ್, ವ್ಹರಯ್ನಾರ್ ಶ್ರೀ ಜೆಸನ್ ಲೊಬೊ, ಶ್ರೀ ಡೆನ್ಜಿಲ್ ಪಿರೇರಾ, ಕುಮಾರಿ ಸಿಮೊನ್ ಮೊಂತೆರೊ, ಐ.ಸಿ.ವೈ.ಎಮ್ ಸಚೇತಕ್ ಮಾನೇಸ್ತ್ ಪ್ರಸಾದ್ ವಾಸ್, ಐ.ಸಿ.ವೈ.ಎಮ್ ಅಧ್ಯಕ್ಷ್ ಲೀಶೊನ್ ಪಿರೇರಾ ಆನಿ ಐ.ಸಿ.ವೈ.ಎಮ್ ಕಾರ್ಯದರ್ಶಿ ಓಶಲ್ ಸೆರಾವೊ ಹಾಜರ್ ಆಸ್ಲಿಂ. ಜಮ್ಲೆಲ್ಯಾ ಸಮೆಸ್ತಾಂಕ್ ಅಧ್ಯಕ್ಷ್ ಲಿಶೋನ್ ಪಿರೇರಾನ್ ಸ್ವಾಗತ್ ಪಾಠಯ್ಲೆಂ. ಉಪ್ರಾಂತ್ ವಿಗಾರ್ ಬಾಪಾನಿಂ ಆಪ್ಲೊ ಸಂದೇಶ್ ದಿಲೊ. ಕಾರ್ಯದರ್ಶಿ ಓಶಲ್ ಸೆರಾವೊನ್ ಧನ್ಯಾವಾದಾಚಿ ಉತ್ರಾo ಉಚಾರ್ಲಿಂ. ಕ್ರೀಶೆಲ್ ಡಿಸೋಜಾ ಆನಿ ಜೆಲ್ರೊಯ್ ವಾಸ್ ಹಾಣಿಂ ವಿಜೇತಾಂಚಿ ನಾಂವಾಂ ವಾಚ್ಲಿಂ ಆನಿ ವಿಜೇತಾಂಕ್ ಇನಾಮಾಂ ವಾಂಟ್ಲಿ. ಪಂಗಡ್ ಗಾಯನಾಂತ್, ನಿತ್ಯಾಧಾರ್ ವಾಡ್ಯಾನ್ ಪಯ್ಲೆo ಸ್ಥಾನ್ ತಶೆಂಚ್ ಸಾಂ. ಫ್ರಾನ್ಸಿಸ್ ಆಸ್ಸಿಸಿ ವಾಡ್ಯಾನ್ ದುಸ್ರೆಂ ಸ್ಥಾನ್ ಆಪ್ಣಾಯ್ಲೆo. ವೆದಿಂ ಕಾರ್ಯೆಂ ಫ್ರೇಯನ್ ವಾಸ್ ಹಾಣೆಂ ಚಲೊವ್ನ್ ವೆಲೆಂ.

ಐ.ಸಿ.ವೈ.ಎಮ್ ಧ್ಯೇಯ್ ಗೀತಾ ಸವೆಂ ಕಾರ್ಯೆಂ ಸಂಪಯ್ಲೆo.