NEWS

ಭುರ್‍ಗ್ಯಾಂಚೆಂ ರಜೆ ಶಿಬಿರ್

Belvai May 26, 2024: ನೀರ್ಮಾರ್ ಕಾಮೆಲಿ ಸಾಂ. ಜುಜೆ ಫಿರ್ಗಜೆಂತ್ ಚವ್ತಿ ಥಾವ್ನ್ ಧಾವಿ ಕ್ಲಾಸ್ ಪರ್‍ಯಾಂತ್ಲ್ಯಾ ಭುರ್ಗ್ಯಾಂಕ್ ವಿಗಾ ಮಾ| ಬಾ| ಪಾವ್ಲ್ ಪಿಂಟೊಚ್ಯಾ ಮುಕೇಲ್ಪಣಾರ್ ಎಪ್ರಿಲ್ 15 ಥಾವ್ನ್ 17 ತಾರಿಕೆ ಪರ್‍ಯಾಂತ್ ತೀನ್ ದಿಸಾಂಚೆಂ ರಜೆ ಶಿಬಿರ್ ಮಾಂಡುನ್ ಹಾಡ್‌ಲ್ಲೆಂ. ನಾಚೊನ್ ಖೆಳೊನ್ ಭಾಗ್ ಘೆವ್ಯಾಂ, ಭರ್ವಶ್ಯಾಚಿಂ ಯಾತ್ರಿಕಾಂ ಜಾವ್ಯಾಂ? ಹ್ಯಾ ಧ್ಯೇಯಾಖಾಲ್ ಮಾಂಡುನ್ ಹಾಡ್‌ಲ್ಲೆಂ ಹೆಂ ಶಿಬಿರ್ ಬೋವ್ ಯಶಸ್ವಿ ರಿತಿನ್ ಚಲ್ಲೆಂ.

ಮಂಗ್ಳುರ್ ದಿಯೆಸೆಜಿಚೆ ಬ್ರ| ಲೊಯ್‌ವಿನ್ ಆನಿ ಆರನ್, ರಿದೆಂಪ್ತೊರಿಸ್ತ್ ಒಡ್ದಿಚೊ ಬ್ರ| ರಿಚರ್ಡ್ ಹಾಜರ್ ಆಸೊನ್ ತೀನ್ ದೀಸ್ ಭುರ್ಗ್ಯಾಂಕ್ ಕಸಲಿಚ್ ಉಬ್ಗೊಣ್ ಭೊಗಾನಾತ್ಲೆ ಬರಿ ತಾಂಣಿ ಶಿಬಿರ್ ಚಲಯ್ಲೆಂ. 

ಸೊಮಾರಾ 15 ತಾರಿಕೆರ್ ಸಕಾಳಿಂ 10:00 ವರಾರ್ ಚಲ್‌ಲ್ಲ್ಯಾ ಉಗ್ತಾವಣ್ ಕಾರ್ಯಾಕ್ ಫಿರ್ಗಜ್ ವಿಗಾರ್ ಮಾ| ಬಾ| ಪಾವ್ಲ್ ಪಿಂಟೊ, ಬ್ರ| ರಿಚರ್ಡ್, ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ಸಂದೀಪ್ ಮಿಸ್ಕಿತ್ ಆನಿ ಕಾರ್ಯದರ್ಶಿ ಉಷಾ ಫೆರ್ನಾಂಡಿಸ್, ಸಂಚಾಲಕಿ ಬೆನೆಡಿಕ್ಟಾ ಮಚಾದೊ ವೆದಿರ್ ಹಾಜರ್ ಆಸ್‌ಲ್ಲಿಂ. ದಿವೊ ಪೆಟಂವ್ಚೆ ದ್ವಾರಿಂ ಕಾರ್ಯೆಂ ಉಗ್ತಾಯ್ಲೆಂ. ಶ್ರೀಮತಿ ಬೆನೆಡಿಕ್ಟಾ ಮಚಾದೊನ್ ಸ್ವಾಗತ್ ಕೆಲೊ, ಬ್ರ| ಲೊಯ್‌ವಿನ್ ಹಾಣೆಂ ಕಾರ್ಯೆಂ ಚಲಯ್ಲೆಂ. ಶಿಬಿರಾಚಿಂ ಮೌಲ್ಯಾಂ ಸಮಾಧಾನ್, ಮಾಯಾಮೋಗ್, ಮೀತ್, ದೇವ್ ಭಿರಾಂತ್, ಖಾಲ್ತೆಪಣ್ ಹಾಚಿ ಪ್ರಾಮುಖ್ಯತಾ ಉಕಲ್ನ್ ಧರ್ಚ್ಯಾಕ್ ಭುರ್ಗ್ಯಾಂನಿ ಬರ್ಪಿಂ ರುಪಾರ್ ಸಾದರ್ ಕೆಲೆಂ. ಭುರ್ಗ್ಯಾಂಕ್ ಪಾಂಚ್ ಗ್ರೂಪ್ ಕರ್ನ್ ಭುರ್ಗ್ಯಾಂಚ್ಯಾ ಅತ್ಮಿಕ್ ವಾಡಾವಳೆಕ್ ಪೂರಕ್ ಜಾವ್ನ್ ಸಬಾರ್ ಸಂಗ್ತಿವಿಶಿಂ ಖೆಳ್, ಮನೋರಂಜನಾದ್ವಾರಿಂ ಶಿಕವ್ಣ್ ದಿಲಿ. 

ಬುಧ್ವಾರಾ 17 ತಾರಿಕೆರ್ ಚಲ್‌ಲ್ಲ್ಯಾ ಸಮಾರೋಪ್ ಕಾರ್ಯಾಕ್ ವಿಗಾರ್ ಬಾಪ್ ಹಾಜರ್ ಆಸೊನ್ ಅತ್ಮಿಕ್ ವಾಡಾವಳ್ ಗರ್ಜೆಚಿ, ಭುರ್ಗ್ಯಾಂಕ್ ಸದಾಂ ಮಿಸಾಕ್ ಯೇಂವ್ಕ್ ಆನಿ ದೇವ್ ಆಪವ್ಣ್ಯಾಕ್ ಪಾಳೊ ದೀಂವ್ಕ್ ಉಲೊ ದಿಲೊ ಆನಿ ಕಾರ್ಯಾಕ್ ಆಧಾರ್ ದಿಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ. ತೀನ್ ದಿಸಾಂನಿ ಮಾಂಡುನ್ ಹಾಡ್‌ಲ್ಲ್ಯಾ ಚಟುವಟಿಕೆಂನಿ ಚಡ್ ಅಂಕ್ ಲಾಬ್‌ಲ್ಲ್ಯಾಂಕ್ ಪಯ್ಲೆಂ, ದುಸ್ರೆಂ ಆನಿ ಉರ್‌ಲ್ಲ್ಯಾ ಗ್ರೂಪಾಂಕ್ ಪ್ರೋತ್ಸಾಹಿತ್ ಇನಾಮಾಂ ವಾಂಟ್ಲಿಂ. ಬ್ರದರ್ ರಿಚರ್ಡಾನ್ ಭುರ್ಗ್ಯಾಂನಿ ಬೋವ್ ಅಪುರ್ಬಾಯೆನ್ ಹ್ಯಾ ಶಿಬಿರಾಂತ್ ಪಾತ್ರ್ ಘೆತ್ಲಾ ಮ್ಹಣ್ ಹೊಗ್ಳಿಕ್ ಉಚಾರ್ಲಿ. ಬ್ರ| ಲೋಯ್‌ವಿನ್ ಹಾಣೆಂ ತೀನ್ ದಿಸಾಂಚೆಂ ಕಾರ್ಯಕ್ರಮ್ ಮಟ್ವ್ಯಾ ವೀಡಿಯೊದ್ವಾರಿಂ ಪ್ರದರ್ಶನ್ ಕೆಲೆಂ. 

ಆಲ್‌ಸ್ಟನ್ ಲೋಬೊನ್ ಕಾರ್ಯೆಂ ಚಲಯ್ಲೆಂ, ಸಾನ್ಜಿಯಾ ಮಿನೇಜಸಾನ್ ಸ್ವಾಗತ್ ಕೆಲೊ. ಪ್ರಿತೇಶ್ ಸಲ್ಡಾನ್ಹಾನ್ ಸರ್ವ್ ಭುರ್ಗ್ಯಾಂ ತರ್‍ಫೆನ್ ಆಪ್ಲಿಂ ಭೊಗ್ಣಾಂ ಉಚಾರ್ಲಿಂ. 

ಸರ್ವ್ ಭುರ್ಗ್ಯಾಂನಿ ಹ್ಯಾ ಶಿಬಿರಾಚೊ ಬೋವ್ ಉತ್ತೀಮ್ ರಿತಿನ್ ಫಾಯ್ದೊ ಜೊಡ್ಲೊ.

Click here:  👉🏻https://daijiworld.com/news/newsDisplay?newsID=1184691