NEWS

'ನಾಚೊನ್ ಖೆಳೊನ್ ಬಾಗ್ ಘೆವ್ಯಾಂ, ಭರ್ವಶ್ಯಾಚಿಂ ಯಾತ್ರಿಕಾಂ ಜಾವ್ಯಾಂ' ಧ್ಯೇಯಾಖಾಲ್ ಕಾಮೆಲಿ ಸಾಂ ಜುಜೆ ಫಿರ್ಗಜೆಂತ್ ಚೊವ್ತ್ಯಾ ಕ್ಲಾಸಿ ಥಾವ್ನ್ ಧಾವಿ ಕ್ಲಾಸಿಚ್ಯಾ ಭುರ್ಗ್ಯಾಂಕ್ ಎಪ್ರಿಲ್ 14 ಥಾವ್ನ್ 16 ತಾರಿಕೆ ಪರ್ಯಾಂತ್ ತೀನ್ ದಿಸಾಂಚೆಂ ರಜೆ ಶಿಬಿರ್ ವಿಗಾರ್ ಬಾಪ್ ಮಾ| ಪಾವ್ಲ್ ಪಿಂಟೊ ಹಾಂಚ್ಯಾ ನಿರ್ದೇಶನಾಖಾಲ್ ಮಂಗ್ಳುರ್ ದಿಯೆಸೆಜಿಚೆ ಬ್ರ| ಜೀವನ್, ಬ್ರ| ಲೋಯ್ಡ್ ಆನಿ ಬ್ರ| ಆಲ್ವಿನ್ ಹಾಣಿಂ ಚಲವ್ನ್ ವ್ಹೆಲೆಂ.

ಎಪ್ರಿಲ್ 14ವೆರ್ ಸಕಾಳಿಂ 9.00 ವರಾರ್ ಪವಿತ್ರ್ ಬಲಿದಾನಾ ಮುಖಾಂತ್ರ್ ಶಿಬಿರಾಚಿ ಸುರ್ವಾತ್ ಕೆಲಿ. ಉಪ್ರಾಂತ್ 9.45 ವರಾರ್ ಉದ್ಘಾಟನ್ ಕಾರ್ಯೆಂ ಸಂಭ್ರಮ್ ಸಾಲಾಂತ್ ಚಲ್ಲೆಂ. ಫಿರ್ಗಜ್ ವಿಗಾರ್ ಮಾ| ಪಾವ್ಲ್ ಪಿಂಟೊ ಬಾಪಾಂನಿ ಅಧ್ಯಕ್ಷ್ ಸ್ಥಾನ್ ಘೆತ್‌ಲ್ಲೆಂ. ವೆದಿಚೆರ್ ಬ್ರ| ಜೀವನ್, ಫಿರ್ಗಜ್ ಗೊವ್ಳಿಕ್ ಮಂಡಳೆಚೊ ಉಪಾಧ್ಯಕ್ಷ್ ಮಾನೆಸ್ತ್ ಸಂದೀಪ್ ಮಿಸ್ಕಿತ್, ಕ್ರಿಸ್ತಿ ಶಿಕ್ಷಣಾಚಿ ಸಂಚಾಲಕ್ ಮಾನೆಸ್ತಿಣ್ ಬೆನಡಿಕ್ಟಾ ಮಚಾದೊ ಹಾಜರ್ ಆಸ್‌ಲ್ಲಿಂ. ಜಮ್‌ಲ್ಲ್ಯಾ ಸರ್ವಾಂಕ್ ಕ್ರಿಸ್ತಿ ಶಿಕ್ಷಣಾಚಿ ಸಂಚಾಲಕ್ ಶ್ರೀಮತಿ ಬೆನೆಡಿಕ್ಟಾ ಮಚಾದೊನ್ ಸ್ವಾಗತ್ ಕೆಲೊ. ವಿಗಾರ್ ಬಾಪಾಂನಿ ಆಪ್ಲ್ಯಾ ಸಂದೇಶಾಂತ್ ಶಿಬಿರಾಚಿ ಗರ್ಜ್ ಭುರ್ಗ್ಯಾಂಕ್ ತಿಳ್ಸಿಲಿ. ಬ್ರದರಾಂನಿ ೩ ದೀಸ್ ವಿವಿಧ್  ಥರಾಂಚ್ಯಾ ಚಟುವಟಿಕಾಂ ಮುಖಾಂತ್ರ್ ಭುರ್ಗ್ಯಾಂಕ್ ಶಿಕವ್ಣ್ ದಿಲಿ. ಶಿಸ್ತ್, ಪವಿತ್ರ್ ಸಭೆ ವಿಶ್ಯಾಂತ್, ಬೈಬಲಾಂತ್ಲೆ ವ್ಯಕ್ತಿ, ದೆವಾಚೊ ಮೋಗ್ ಆನಿ ಸಾಮಾಜಿಕ್ ಜಾಳಿಜಾಗ್ಯಾಂವಿಶಿಂ ಮಾಹೆತ್ ದಿಲಿ.