NEWS

ಸ್ತ್ರೀ ಸಂಘಟನಾಥಾವ್ನ್ ಕೇಸ್ ದಾನ್ ಶಿಬಿರ್

ವಿಗಾರ್ ಬಾಪಾಂನಿ ‘ಕೇಸ್ ದಾನ್ ಕರ‍್ಚೆಂ ವಾ ಅಂಗ್‌ದಾನ್ ಕರ‍್ಚೆಂ ಫಕತ್ತ್ ತ್ಯಾ ಪಿಡೆಸ್ತಾಂಕ್ ಆಧಾರ್ ಜಾಯ್ನಾ, ಬಗಾರ್ ಆಮ್ಚ್ಯಾ ಜಿವಿತಾಕ್ ಏಕ್ ಉದ್ದೇಶ್ ಆನಿ ಆರ‍್ತ್ ದಿತಾ’ ಮ್ಹಣ್ ಆಪ್ಲೊ ಸಂದೇಶ್ ದೀವ್ನ್ ಕಾರ‍್ಯಾಕ್ ಬರೆಂ ಮಾಗ್ಲೆಂ.

ಮಾನೆಸ್ತಿಣ್ ಉಷಾ ಫೆರ‍್ನಾಂಡಿಸಾನ್ ಕ್ಯಾನ್ಸರ್ ಪಿಡೆಸ್ತಾಂಕ್ ಕೇಸ್ ದಾನ್ ಕೆಲ್ಲೆವರ‍್ವಿಂ ತಾಂಚ್ಯಾ ಜಿವಿತಾಕ್ ಏಕ್ ಸಂತೊಸ್ ತಶೆಂ ಆತ್ಮ್‌ವಿಶ್ವಾಸ್ ಹಾಡ್ತಾ ಮಾತ್ರ್ ನ್ಹಯ್ ಏಕ್ ಏಕ್ ನವೊ ಭರ‍್ವಸೊ ಉಬ್ಜಯ್ತಾ ಮ್ಹಣ್ ಸಾಂಗೊನ್ ಹೆಂ ಕಾರ‍್ಯೆಂ ಯಶಸ್ವಿ ಜಾಂವ್ಕ್ ವಾವುರ‍್ಲೆಲ್ಯಾ ಸಮೇಸ್ತಾಂಚೊ ಉಪ್ಕಾರ್ ಬಾವುಡ್ಲೊ. ಸೂಕ್ತ್ ರಿತಿನ್ ಕೇಸ್ ಸಂಗ್ರಹ್ ಕರುಂಕ್ ವಾವುರ‍್ಲೆಲ್ಯಾ ಮರ್ಸಿ ಬ್ಯೂಟಿ ಅಕಾಡೆಮಿಕ್ ಅಭಿನಂದನ್ ಪಾಟಯ್ಲೆ. ಕಾರ‍್ಯಾಚ್ಯಾ ಯಶಸ್ವೆ ಪಾಟ್ಲ್ಯಾನ್ ವಾವುರ‍್ಲೆಲ್ಯಾ ಫ್ಲೈ ಹೈ ಚಾರಿಟೇಬಲ್ ಟ್ರಸ್ಟಾಚಿ ಸ್ಥಾಪಕ್ ಮಾನೆಸ್ತಿಣ್ ಶೆರಿಲ್ ಆಯೋನಾಚೊ, ಸ್ತ್ರೀ ಆಯೋಗ್ ತಶೆಂಚ್ ಸಂಘಟನಾಚ್ಯಾ ಸಾಂದ್ಯಾಂಚೊ, ನಿರ‍್ಮಾರ್ ಫಿರ‍್ಗಜ್‌ಗಾರಾಂಚೊ ಉಪ್ಕಾರ್ ಆಟಯ್ಲೊ.

ಉಪ್ರಾಂತ್ ಕ್ಯಾನ್ಸರ್ ಪಿಡೆಸ್ತಾಂಕ್ ವಿಗ್ ತಯಾರ್ ಕರುಂಕ್ ಕೇಸ್ ದಾನ್ ಕಾರ‍್ಯೆಂ ಚಲ್ಲೆಂ. ಹ್ಯಾ ಶಿಬಿರಾಂತ್ ಜಾತ್-ಬೇಧ್, ಧರ್ಮ್ ನಾಸ್ತಾನಾ ಕೊಣೆಂಯೀ ಭಾಗ್ ಘೆಂವ್ಕ್ ಆವ್ಕಾಸ್ ಆಸಾ ಕೆಲ್ಲೊ. ಆನಿ 7 ಥಾವ್ನ್ 75 ವರ‍್ಸಾಂ ಪ್ರಾಯೆಚ್ಯಾ 80 ಜಣಾಂನಿ ಕ್ಯಾನ್ಸರ್ ಪಿಡೆಸ್ತಾಂಕ್ ಏಕ್ ನವೊ ಭರ್ವಸೊ ದಿಂವ್ಚ್ಯಾ ಹ್ಯಾ ದಯಾಳ್ ಕರ‍್ನೆಂತ್ ಭಾಗ್ ಘೆತ್ಲೊ. ಕೇಸ್ ದಾನ್ ಕೆಲ್ಲ್ಯಾ ಸರ‍್ವಾಂಕ್ ಸರ್ಟಿಫಿಕೇಟ್ ತಶೆಂಚ್ ಬೊಂಡಾ ಮಿಲ್ಕ್ ಶೇಕ್ ದೀವ್ನ್ ಉಪ್ಕಾರ್ ಬಾವುಡ್ಲೊ.

ಮಾನೆಸ್ತಿಣ್ ಅನುಷಾ ಡಿಸೋಜಾನ್ ಸ್ವಾಗತ್ ಕೆಲೊ. ಮಾನೆಸ್ತಿಣ್ ಸವಿತಾ ಪಿರೇರಾನ್ ಕಾರ‍್ಯೆಂ ಚಲಯ್ಲೆಂ. ವೈಸಿಎಸ್ ಅಧ್ಯಕ್ಷ್ ಡೇಝಿ ಕ್ರಾಸ್ತಾನ್ ಸರ್ಟಿಫಿಕೇಟಿರ್ ದಾನಿಂಚಿಂ ನಾಂವಾಂ ಬರಂವ್ಕ್ ಕುಮೊಕ್ ಕೆಲಿ. ಮಾನೆಸ್ತಿಣ್ ನಮಿತಾ ರೆಬೆಲ್ಲೊ ಆನಿ ಮಾನೆಸ್ತಿಣ್ ಸರಿತಾ ಕ್ರಾಸ್ತಾನ್ ತಸ್ವಿರ್ ಕಾಡುಂಕ್ ಕುಮೊಕ್ ಕೆಲಿ.

ಹೆಂ ಕಾರ‍್ಯೆಂ ಏಕ್ ಲ್ಹಾನ್ ದಯಾಳ್ ಕರ‍್ನೆದ್ವಾರಿಂ ಸಮಾಜೆಂತ್ ಉರ್‌ಲ್ಲ್ಯಾಂಚ್ಯಾ ಜಿವಿತಾಂಕ್ ಏಕ್ ವ್ಹಡ್ ಪ್ರಮಾಣಾರ್ ಪ್ರಭಾವ್ ಘಾಲುಂಕ್ ಸಕ್ತಾ ಮ್ಹಳ್ಳೊ ಸಂದೇಶ್ ದೀಂವ್ಕ್ ಪಾವ್ಲೆಂ.