Embedded Files
ಸ್ತ್ರೀ ಸಂಘಟನಾಥಾವ್ನ್ ಆವಯಾಂಚೊ ದೀಸ್ ಆಚರಣ್
ಸ್ತ್ರೀ ಸಂಘಟನಾಥಾವ್ನ್ ಆವಯಾಂಚೊ ದೀಸ್ ಆಚರಣ್
ಆಮ್ಚ್ಯಾ ಫಿರ‍್ಗಜೆಂತ್ ಮೇ 11ವೆರ್ ಸಕಾಳಿಂ 7.30 ವರಾಂಚ್ಯಾ ಮಿಸಾಸವೆಂ ಆವಯಾಂಚೊ ದೀಸ್ ಭೋವ್ ಸಂಭ್ರಮಾನ್ ಆಚರಣ್ ಕೆಲೊ. ಸ್ತ್ರೀ ಸಂಘಟನಾಚ್ಯಾ ಸಾಂದ್ಯಾಂನಿ ಅಪುರ್ಬಾಯೆನ್ ದೇವ್‌ಸ್ತುತಿ ಚಲವ್ನ್ ವೆಲಿ.
ಮಿಸಾ ಉಪ್ರಾಂತ್ ಸಂಭ್ರಮ್ ಹೊಲಾಂತ್ ಆವಯಾಂಕ್ ಉಲ್ಲಾಸುನ್ ಮಟ್ವೆಂ ಕಾರ‍್ಯೆಂ ಆಸಾ ಕೆಲ್ಲೆಂ. ಹ್ಯಾ ಕಾರ‍್ಯಾಕ್ ವಿಗಾರ್ ಮಾ| ಬಾ| ಪಾವ್ಲ್ ಪಿಂಟೊ, ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಮಾನೆಸ್ತ್ ಸಂದೀಪ್ ಮಿಸ್ಕಿತ್, ಹೊಲಿಕ್ರಾಸ್ ಕೊವೆಂತಾಚಿ ಸುಪೀರಿಯರ್ ಸಿ| ಸುಜಾತಾ ಡೆಸಾ, ಗೊವ್ಳಿಕ್ ಪರಿಷದ್ ಕಾರ್ಯದರ್ಶಿ ತಶೆಂಚ್ ಸ್ತ್ರೀ ಸಂಘಟನ್ ಅಧ್ಯಕ್ಷ್ ಮಾನೆಸ್ತಿಣ್ ಉಷಾ ಫೆರ್ನಾಂಡಿಸ್, ಸ್ತ್ರೀ ಸಂಘಟನ್ ಕಾರ್ಯದರ್ಶಿ ಮಾನೆಸ್ತಿಣ್ ರೇಷ್ಮಾ ಪಿರೇರಾ ವೆದಿರ್ ಹಾಜರ್ ಆಸ್‌ಲ್ಲಿಂ.
ಪ್ರಾರ‍್ತನ್ ಗಿತಾದ್ವಾರಿಂ ಸಂಘಟನ್ ಸಾಂದ್ಯಾಂನಿ ಕಾರ‍್ಯಾಕ್ ಸುರ‍್ವಾತ್ ಕೆಲಿ. ವಿಗಾರ್ ಬಾಪಾಂನಿ ಸರ‍್ವ್ ಆವಯಾಂಚೊ ಉಗ್ಡಾಸ್ ಕಾಡ್ನ್ ಹರ‍್ಯೆಕಾ ಆವಯ್ನ್ ತಿಚ್ಯಾ ಕುಟ್ಮಾಖಾತಿರ್ ಕರ‍್ಚೊ ತ್ಯಾಗ್ ವರ‍್ಣುನ್ ಸಮಾಜ್ ನಿರ್ಮಾಣ್ ಕರ‍್ಚ್ಯಾಂತ್ ತಾಂಚೊ ಪಾತ್ರ್ ಬೋವ್ ಉತ್ತೀಮ್ ಮ್ಹಣ್ ಹೊಗೊಳ್ಸುನ್ ಸರ‍್ವ್ ಆವಯಾಂಕ್ ಅಭಿನಂದನ್ ಪಾಟಯ್ಲೆ.
ಮನೋರಂಜನ್ ಕಾರ‍್ಯೆಂ ಜಾವ್ನ್ ಮಾನೆಸ್ತಿಣ್ ಜ್ಯೋತಿ ರೆಬೆಲ್ಲೊ ಆನಿ ಮಾನೆಸ್ತಿಣ್ ಲವೀನಾ ಪೆರಿಸಾಚ್ಯಾ ಮುಕೇಲ್ಪಣಾರ್ ಸ್ತ್ರೀಯಾಂನಿ ಪದಾಂ ಸಾದರ್ ಕೆಲಿಂ. ಉಪ್ರಾಂತ್ ಭುರ‍್ಗ್ಯಾಂನಿ ಡ್ಯಾನ್ಸ್ ಸಾದರ್ ಕೆಲೆಂ. ಮಾನೆಸ್ತಿಣ್ ಪ್ರಮೀಳಾ ರೊಡ್ರಿಗಸಾನ್ ಥೊಡೆ ಖೆಳ್ ಚಲವ್ನ್ ವೆಲೆ. ವಿಗಾರ್ ಬಾಪಾಂನಿ ಜಿಕ್‌ಲ್ಲ್ಯಾಂಕ್ ಇನಾಮಾಂ ವಾಂಟ್ಲಿಂ. ಹ್ಯಾ ಕಾರ‍್ಯಾಕ್ ಸಹಕಾರ್ ದಿಲ್ಲ್ಯಾ ಭುರ‍್ಗ್ಯಾಂಕ್ ಫಿರ‍್ಗಜ್ ಗೊವ್ಳಿಕ್ ಉಪಾಧ್ಯಕ್ಷಾನ್ ಮೊಗಾಚಿ ಕಾಣಿಕ್ ದಿಲಿ.
ಮಾನೆಸ್ತಿಣ್ ಉಷಾ ಫೆರ್ನಾಂಡಿಸಾನ್ ಸ್ವಾಗತ್ ಕೆಲೊ. ಮಾನೆಸ್ತಿಣ್ ರೇಶ್ಮಾ ಪಿರೇರಾನ್ ಕಾರ‍್ಯೆಂ ಚಲಯ್ಲೆಂ. ಮಾನೆಸ್ತಿಣ್ ಜೆನೆವಿವ್ ರೆಬೆಲ್ಲೊನ್ ಧನ್ಯವಾದ್ ಪಾಟಯ್ಲೆ. ಮಾನೆಸ್ತಿಣ್ ನಮಿತಾ ರೆಬೆಲ್ಲೊನ್ ತಸ್ವಿರ್ ಕಾಡುಂಕ್ ಸಹಕಾರ್ ದಿಲೊ.
ಹ್ಯಾ ಕಾರ‍್ಯಾಕ್ 190 ಜಣ್ ಆವಯೊ ಹಾಜರ್ ಆಸ್‌ಲ್ಲ್ಯೊ ಆನಿ ಉಗ್ಡಾಸಾಚಿ ಕಾಣಿಕ್ ಜಾವ್ನ್ ಸರ‍್ವಾಂಕ್ ರುಮಾಲ್ (handkerchief) ವಿತರಣ್ ಕೆಲೊ. ಹಾಜರ್ ಆಸ್‌ಲ್ಲ್ಯಾ ಸರ‍್ವಾಂಕ್ ಕಾಫಿ ಫಳ್ಹಾರ್ ವಾಂಟ್ಲೊ.
Google Sites
Report abuse