NEWS

ಮದರ್ ತೆರೆಸಾ ವಾಡೊ: ವಾಡ್ಯಾ ಫೆಸ್ತ್ ಆಚರಣ್

ಕೊಲ್ಕೊತ್ತಾಚ್ಯಾ ಸಾಂ ತೆರೆಜಾಕ್ ಸಮರ‍್ಪಿಲ್ಲ್ಯಾ ಮದರ್ ತೆರೆಜಾ ವಾಡ್ಯಾಗಾರಾಂನಿ ಪಾತ್ರೊನ್ ಸಾಂತಿಣಿಕ್ ಮಾನ್ ಕರ‍್ನ್ ಸಪ್ತೆಂಬರ್ 15 ತಾರಿಕೆರ್ ವಾಡ್ಯಾ ಫೆಸ್ತ್ ವ್ಹಡಾ ಸಂಭ್ರಮಾನ್ ಆಚರಣ್ ಕೆಲೆಂ.

ಸಕಾಳಿಂ 7.30 ವೊರಾಂಚ್ಯಾ ಅರ್ಗಾಂ ಬಲಿದಾನಾಸವೆಂ ವಾಡ್ಯಾಚಾ ಸಾಂದ್ಯಾನಿ ವಾಂಟೊ ಘೆವ್ನ್ ವಾಡ್ಯಾ ಫೆಸ್ತಾಚೊ ಸಂಭ್ರಮ್ ಆರಂಭ್ ಕೆಲೊ. ತ್ಯಾಚ್ ದಿಸಾ ಸಾಂಜೆರ್ ಆಸಾ ಕೆಲ್ಲ್ಯಾ ವಾಡ್ಯಾಚ್ಯಾ ಸಹಮಿಲನಾಕ್ ವಿಗಾರ್ ಮಾ| ಬಾ|  ಪಾವ್ಲ್ ಪಿಂಟೊ, ಹೋಲಿ ಕ್ರಾಸ್ ಕೊವೆಂತಾಚ್ಯೊ ಧರ್ಮ್ ಭಯ್ಣಿಂ ಸಿ| ಸುಜಾತಾ ಡೆಸಾ ಆನಿ ಸಿ| ಪೆಟ್ರಿಶಿಯಾ ಕ್ರಾಸ್ತಾ,  ಗೊವ್ಳಿಕ್ ಪರಿಷದೆಚೆ ಉಪಾಧ್ಯಕ್ಷ್ ಶ್ರೀ ಸಂದೀಪ್ ಮಿಸ್ಕಿತ್, ಕಾರ್ಯದರ್ಶಿ ಶ್ರೀಮತಿ ಉಷಾ ಫೆರ್ನಾಂಡಿಸ್, ಲ್ಹಾನ್ ಕ್ರಿಸ್ತಾಂವ್ ಸಮುದಾಯೆಚಿ ಸಂಚಾಲಕಿ ಸಬಿತಾ ಸಲ್ಡಾನ್ಹ, ಸಂಪನ್ಮೂಳ್ ವ್ಯಕ್ತಿ ಶ್ರೀಮತಿ ರೇಶ್ಮಾ ಪಿರೇರಾ ತಶೆಂಚ್ ಹೆರ್ ವಾಡ್ಯಾಂಚೆ ಗುರ್ಕಾರ್, ಪ್ರತಿನಿಧಿ ಹಾಜರ್ ಆಸ್‌ಲ್ಲೆ. 

ವಾಡ್ಯಾ ಸಮಿತಿಚ್ಯಾ ಸಾಂದ್ಯಾಂಸವೆಂ ಚಾ ಮುಖೆಲ್ಯಾ ಸವೆಂ ಪವಿತ್ರ್ ಪುಸ್ತಕಾಕ್ ಮಾನ್ ಪಾಟಯ್ತಚ್ ವಿಗಾರ್ ಬಾಪಾಂನಿ ಮುಕ್ಲಿ ಮಾಗ್ಣ್ಖಾ ವಿಧಿ ಚಲವ್ನ್ ವ್ಹೆಲಿ. ಮರಿಯೆಚ್ಯಾ ಮನಾಕ್ ಗೀತ್ ಗಾವುನ್ ಸರ್ವಾಂನಿ ನೊವೆಂ ಸ್ವೀಕಾರ್ ಕೆಲೆಂ.

ಪ್ರಾರ್ಥನ್ ನೃತ್ಯಾದ್ವಾರಿಂ ವೆದಿ ಕಾರ‍್ಯೆಂ ಸುರ‍್ವಾತ್ಲೆಂ. ಹಾಜರ್ ಆಸ್‌ಲ್ಲ್ಯಾ ಮಾನಾಚ್ಯಾ ಸೈರ‍್ಯಾಂಕ್ ಫುಲಾಂಚೆಂ ಝಾಡ್ ದೀವ್ನ್ ಸ್ವಾಗತ್ ಕೆಲೊ. ಶ್ರೀಮತಿ ರೇಶ್ಮಾ ಪಿರೇರಾನ್ ಸಮುದಾಯ್ ಬಾಂದುನ್ ಹಾಡ್ಚೆವಿಶಿಂ ಮಾಹೆತ್ ದಿಲಿ.

ವಾಡ್ಯಾಚಾ ಉದರ‍್ಗತೆ ಖಾತಿರ್ ನಿಸ್ವಾರ್ಥ್ ಸೆವಾ ದಿಲ್ಲ್ಯಾ ಮಾಜಿ ಗುರ್ಕಾರ್ ಶ್ರೀಮತಿ ರೆನ್ನಿ ಪಿರೇರಾ ಆನಿ ಪ್ರಶಾಂತ್ ಪಿರೇರಾ ಹಾಂಕಾಂ ಧಿನ್ವಾಸ್ಣೆಚ್ಯಾ ಉತ್ರಾಂ ಆನಿ ಇನಾಮಾಸವೆಂ ಮಾನ್ ದಿಲೊ. ಧಾವೆ ಕ್ಲಾಸಿಂತ್ ಉಂಚ್ಲೆಂ ಅಂಕ್ ಆನಿ ದೊತೊರ‍್ನೆಚ್ಯಾ ಪರೀಕ್ಶೆಂತ್ ಉತ್ತಮ್ ಅಂಕ್ ಆಪ್ಣಾಯಿಲ್ಲ್ಯಾ ಅಲ್ರೀನಾ ಪಿರೇರಾಕ್, ತಾಲೂಕ್ ಮಟ್ಟಾರ್ ಚೆಸ್ ಪಂದ್ಯಾಟಾಂತ್ ವಿಜೇತ್ ಜಾಲ್ಲ್ಯಾ ರಿಶೋನ್ ಮಿನೇಜಸಾಕ್ ತಶೆಂಚ್ ಶಿಕ್ಪಾಂತ್ ಆನಿ ದೊತೊರ‍್ನೆಚ್ಯಾ ಪರೀಕ್ಷೆಂತ್ ಚಡ್ ಅಂಕ್ ಅಪ್ಣಾಯಿಲ್ಲ್ಯಾ ಗ್ಲೆನ್ ರೊಡ್ರಿಗಸಾಕ್ ವಾಡ್ಯಾ ತರ‍್ಫೆನ್ ಕಾಣಿಕ್ ದಿವುನ್ ಶಾಭಾಸ್ಕಿ ಪಾಟಯ್ಲಿ. ಕರ್ನಾಟಕ ಸರ್ಕಾರಾ ಥಾವುನ್ ಮಣ್ಜೆ Karnataka DST Nano Science Fellowship ಪಿ.ಎಚ್.ಡಿ ಸನದ್ ಆಪ್ಣಾಯಿಲ್ಲ್ಯಾ ಕೆನ್ನೆತ್ ಲೋಬೊಕ್ ಮಾನಾಚಿ ಕಾಣಿಕ್ ದೀವ್ನ್ ಶಾಭಾಸ್ಕಿ ಪಾಟಯ್ಲಿ.

ಉಪ್ರಾಂತ್ ‘ಆಸುಂದಿ ಮೋಗ್’ ಮ್ಹಳ್ಳ್ಯಾ ಗಾಯನಾಸವೆಂ ಸಾಂಸ್ಕೃತಿಕ್ ಕಾರ‍್ಯೆಂ ಸುರ‍್ವಾತ್ಲೆಂ.  ‘ಆವಯ್’ ಮ್ಹಳ್ಳೊ ಸೊಭಿತ್ತ ನಾಟ್ಕುಳೊ ಸಾದಾರ್ ಕರ್ನ್ ಮೊಲಾಧಿಕ್ ಸಂದೇಶ್ ವಾಂಟ್ಲೊ. ಭುರ‍್ಗ್ಯಾಂನಿ  ತಶೆಂ ವಾಡ್ಯಾಚ್ಯಾ ಸ್ತ್ರೀಯಾಂನಿ ನಾಚ್ ಸಾದರ್ ಕೆಲೊ. ವಾಡ್ಯಾಚಿ ಪಾತ್ರೊನ್ ಸಾಂತಿಣ್ ಮದರ್ ತೆರೆಜಾಚಿ ಝಳಕ್ ಜಾವ್ನ್ ಶ್ರೀಮತಿ ನೋರಾ ಲೋಬೋನ್ ಆಕರ್ಶಕ್ ಪಾತ್ರ್ ದಾಕಯ್ಲೊ. ಸಬಾರ್ ಖೆಳ್ ಖೆಳವ್ನ್ ಸರ‍್ವಾಂಚಿಂ ಮನಾಂ ಧಾದೊಸ್ ಕೆಲಿಂ. 

ಕು. ರೀಮಾ ಪಿರೇರಾ ಆನಿ ಬೆನಿಟಾ ರೊಡ್ರಿಗಸಾನ್ ಸಗ್ಳೆಂ ಕಾರ‍್ಯೆಂ ಬೋವ್ ಅಪುರ‍್ಬಾಯೆನ್ ಚಲೊನ್ ವೆಲೆಂ. ರುಚಿಕ್ ಜೆವ್ಣಾಸವೆಂ ಕಾರ‍್ಯೆಂ ಸಂಪ್ಲೆಂ.