Embedded Files
ಸಮುದಾಯ್ ದೀಸ್ ಆಚರಣ್
ಕಾಮೆಲಿ ಸಾಂ ಜುಜೆ ಫಿರ್ಗಜೆಂತ್ ಮೇ 1ವೆರ್ 2025 ಸಮುದಾಯ್ ದೀಸ್ ಸಾಂಜೆರ್ 4.30 ವರಾರ್ ಸಂಭ್ರಮಿಕ್ ಮಿಸಾಸವೆಂ ವ್ಹಡಾ ದಬಾಜಾನ್ ಆಚರಣ್ ಕೆಲೊ. ಪ್ರಧಾನ್ ಯಾಜಕ್ ಜಾವ್ನ್ ಸಿ.ಒ.ಡಿ.ಪಿ ಸಂಸ್ಥ್ಯಾಚೊ ದಿರೊಕ್ತರ್ ಮಾ| ಬಾ| ವಿನ್ಸೆಂಟ್ ಡಿಸೋಜಾ ಹಾಜರ್ ಆಸೊನ್ ಸಮುದಾಯಾಂತ್ ಎಕಾಮೆಕಾ ಲಾಗಿಂ ಸಂಬಂಧ್ ದವರುಂಕ್ ಮಾಗ್ಣೆಂ ಗರ್ಜೆಚೆಂ, ದೆವಾಚೆಂ ಉತರ್ ದಿಸ್ಪೊಡ್ತೆಂ ವಾಚುನ್ ಭಾವಾರ್ಥ್ ಪರ್ಗಟುನ್ ಭರ್ವಶ್ಯಾಚಿಂ ಯಾತ್ರಿಕಾಂ ಜಾವ್ಯಾಂ ಮ್ಹಣ್ ಅರ್ಥಾಭರಿತ್ ಶೆರ್ಮಾಂವ್ ದಿಲೊ.
ಮಿಸಾ ಉಪ್ರಾಂತ್ ಸಾಂಜೆರ್ 5.50 ವರಾರ್ ಲ್ಹಾನ್ ಕ್ರಿಸ್ತಾಂವ್ ಸಮುದಾಯಾಚೊ ಸಂಚಾಲಾಕ್ ಆನಿಂ ಕೇಂದ್ರಿಕ್ ಸಮಿತಿಚ್ಯಾ ಸಾಂದ್ಯಾನಿಂ ಪವಿತ್ರ್ ಪುಸ್ತಕ್ ಪುರ್ಶಾಂವಾರ್ ಹಾಡ್ನ್ ಮಾನ್ ಕರ್ನ್ ಪ್ರಾರ್ಥನ್ ಗಿತಾಂ ದ್ವಾರಿಂ ವೆದಿ ಕಾರ್ಯೆಂ ಸುರ್ವಾತ್ಲೆಂ. ಲ್ಹಾನ್ ಕ್ರಿಸ್ತಾಂವ್ ಸಮುದಾಯಾಚಿ ಸಂಚಾಲಕಿ ಶ್ರೀಮತಿ ಶಬಿತ ಸಲ್ಡಾನ್ಹಾನ್ ಮಾನಾಚೆ ಸಯ್ರೆ ಫಿರ್ಗಜ್ ವಿಗಾರ್ ಮಾ| ಬಾ| ಪಾವ್ಲ್ ಪಿಂಟೊ, ಮಾ| ಬಾ| ವಿನ್ಸೆಂಟ್ ಡಿಸೋಜ, ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಶ್ರೀ ಸಂದೀಪ್ ಮಿಸ್ಕಿತ್, ಕಾರ್ಯದರ್ಶಿ ಶ್ರೀಮತಿ ಝೀಟಾ ಉಷಾ ಫೆರ್ನಾಂಡಿಸ್ ಹಾಂಕಾಂ ವೆದಿಕ್ ಆಪವ್ನ್ ಹಾಡ್ಲೆಂ.
ಮಾ| ಬಾ| ವಿನ್ಸೆಂಟ್ ಡಿಸೋಜಾನ್ ವಾವ್ರಾಡ್ಯಾoಚೊ ವಾವ್ರ್ ಆನಿಂ ಸ್ರೀಯಾಂಚೊ ವಾವ್ರ್ ವಿಶೇಷ್ ರಿತಿನ್ ಉಚಾರ್ಲೊ ಆನಿಂ ದೆವಾನ್ ದಿಲ್ಲ್ಯಾ ಉಪ್ಕಾರಾಂಕ್ ಅರ್ಗಾಂ ಪಾಟವ್ನ್ ಆಮ್ಚಿ ಮಾಗ್ಣಿಂ ದೆವಾ ಥಂಯ್ ಉಬಾರಿಜಯ್ ಹಾಚೆವರ್ವಿಂ ದೇವ್ ಆಮ್ಕಾಂ ಬೊರಿ ಭಲಾಯ್ಕಿ ಮತಿಕ್ ಸಮಾಧಾನ್ ಫಾವೊ ಕರ್ತಾ ಮ್ಹಣ್ ತಾಣೆ ಸಾಂಗ್ಲೆಂ.
ಕಾರ್ಯಕ್ರಮಾಚೆಂ ಅಧ್ಯಕ್ಷ್ ಸ್ಥಾನ್ ಘೆತ್ ಲ್ಯಾ ವಿಗಾರ್ ಮಾ| ಬಾ| ಪಾವ್ಲ್ ಪಿಂಟೊ ಹಾಂಣಿ ಆಪ್ಲ್ಯಾ ಸಂದೇಶಾಂತ್ ದೆವಾಥಂಯ್ ಸಂಬಂಧ್ ಅಸೊಂದಿ, ಪೆಲ್ಯಾಥಂಯ್ ಸಂಬಂಧ್ ಬಾಂದುನ್ ಹಾಡುಂಕ್ ಹೆಂ ಆಚರಣ್ ಕಾರಣ್ ಜಾಂವ್ದಿ, ಸಮುದಾಯಾ ವರ್ವಿಂ ಬೊರೆ ಮುಕೆಲಿ ಪುಲವ್ನ್ ಯೆಂವ್ಂ ಅಶೆಂ ನಿರಂತರ್ ವಾವುರ್ಚಿ ಉರ್ಬಾ ಆಮ್ಚೆ ಮಧೆಂ ವಾಡುಂದಿ ಮ್ಹಳ್ಳೊ ಉಲೊ ದಿಲೊ.
ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಶ್ರೀ ಸಂದೀಪ್ ಮಿಸ್ಕಿತಾನ್ ಸ್ವಾಗತ್ ಕೆಲೊ, ವಿಗಾರ್ ಬಾಪಾನಿಂ ದಾನಿಂಚಿಂ ನಾಂವಾಂ ವಾಚುನ್ ತಾoಚೊ ಉಪ್ಕಾರ್ ಆಟಯ್ಲೊ. ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಕೇಂದ್ರಿಕ್ ಸಮಿತಿ ಸಾಂದೊ ಶ್ರೀಮತಿ ರಿನ್ನ ಪಿರೇರಾನ್ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ. ಶ್ರೀಮತಿ ಸಿಂತಿಯಾ ರೇಂಜಲಾನ್ ವೆದಿ ಕಾರ್ಯೆಂ ಚಲವ್ನ್ ವೆಲೆಂ.
ಉಪ್ರಾಂತ್ ಸೊಳಾ ವಾಡ್ಯಾ ಥಾವ್ನ್ ಚಾರ್ ಪಂಗಡಾ ದ್ವಾರಿಂ ಸಾಂಸ್ಕೃತಿಕ್ ಕಾರ್ಯೆಂ ಪ್ರದರ್ಶಿತ್ ಕೆಲೆಂ. ಫಿರ್ಗಜ್‌ಗಾರಾಂನಿ ಸಾಂಗಾಂತಾ ಮೆಳುನ್ ತಯಾರ್ ಕೆಲ್ಲ್ಯಾ ಜೆವ್ಣಾಚೆರ್ ವಿಗಾರ್ ಬಾಪಾಂನಿ ಆಶಿರ್ವಾದ್ ಮಾಗ್ತಚ್ ರುಚಿಕ್ ಜೆವ್ಣಾದ್ವಾರಿಂ ಕಾರ್ಯೆಂ ಸಂಪ್ಲೆಂ.
Google Sites
Report abuse