NEWS

ಆಮ್ಚ್ಯಾ ಫಿರ‍್ಗಜೆಂತ್ ಮೇ 7ವೆರ್ 33 ಭುರ‍್ಗ್ಯಾಂನಿ ಥಿರಾವ್ಣೆಚೊ ಸಂಸ್ಕಾರ್ ಸ್ವೀಕಾರ್ ಕೆಲೊ. ಆಮ್ಚೆ ವಿಶ್ರಾಂತ್ ಗೊವ್ಳಿಬಾಪ್ ಅ| ಮಾ| ದೊ| ಅಲೋಶಿಯಸ್ ಪಾವ್ಲ್ ಸೊಜ್ ಹಾಂಣಿ ಹೊ ಸಂಸ್ಕಾರ್ ದಿಲೊ.

ಥಿರಾವ್ಣೆಚ್ಯಾ ಸಂಸ್ಕಾರಾಕ್ ತಯಾರಾಯ್ ಜಾವ್ನ್ ಹೊ ಸಂಸ್ಕಾರ್ ಘೆಂವ್ಚ್ಯಾ ಭುರ‍್ಗ್ಯಾಂಕ್ ಎಪ್ರಿಲ್ 21 ಥಾವ್ನ್ ಮೇ 6 ತಾರಿಕೆ ಪರ‍್ಯಾಂತ್ ವಿಗಾರ್ ಬಾಪಾಂಚ್ಯಾ ಮಾರ‍್ಗದರ‍್ಶನಾಖಾಲ್ ಶ್ರೀಮತಿ ಸಿಂತಿಯಾ ರೇಂಜಲ್ ಆನಿ ಶ್ರೀಮತಿ ಬೆನೆಡಿಕ್ಟಾ ಮಚಾದೊ ಹಾಂಣಿ ದೊತೊರ‍್ನ್ ಚಲವ್ನ್ ವೆಲಿ. ಮೇ 6ವೆರ್ ಭುರ‍್ಗ್ಯಾಂಕ್ ಪರೀಕ್ಷಾ ಚಲಯ್ಲಿ.

ಮೇ 7ವೆರ್ ಸಾಂಜೆರ್ 4.30 ವರಾರ್ ಥಿರಾವ್ಣೆಚೊ ಸಂಸ್ಕಾರ್ ಘೆಂವ್ಚಿ ಭುರ‍್ಗಿಂ ಸರ‍್ವ್ ಹಾಜರ್ ಆಸೊನ್ ವಿಗಾರ್ ಬಾಪಾಂನಿ ತಶೆಂಚ್ ಶ್ರೀಮತಿ ಸಿಂತಿಯಾ ರೇಂಜಲಾನ್ ಥಿರಾವ್ಣೆಚ್ಯಾ ಸಾಕ್ರಾಮೆಂತಾವಿಶಿಂ ಸವಾಲಾಂ ವಿಚಾರ‍್ಲಿಂ ಆನಿ ಭುರ‍್ಗ್ಯಾಂನಿ ಜಾಪಿ ದಿಲ್ಯೊ.5.00 ವರಾಂಚ್ಯಾ ಮಿಸಾರ್ ಬಿಸ್ಪ್ ಸಾಯ್ಬಾಂನಿ 33 ಭುರ‍್ಗ್ಯಾಂಕ್ ಥಿರಾವ್ಣೆಚೊ ಸಾಕ್ರಾಮೆಂತ್ ದಿಲೊ. ಮಿಸಾ ಉಪ್ರಾಂತ್ ದೊತೊರ‍್ನೆಚೊ ಆಲ್ಬಮ್ ಆನಿ ಪರೀಕ್ಷೆಂತ್ ಇನಾಮಾಂ ಆಪ್ಣಾಯಿಲ್ಲ್ಯಾ 9 ಜಣಾಂ ಭುರ‍್ಗ್ಯಾಂಕ್ ಬಿಸ್ಪ್ ಸಾಯ್ಬಾಂನಿ ಇನಾಮಾಂ ವಾಂಟ್ಲಿಂ.