NEWS

ನವೆಂಬರ್ 2 ತಾರಿಕೆರ್ ಸೆಕುಲರ್ ಪ್ರಾನ್ಸಿಸ್ಕನ್  ಒಡ್ದಿಚೆಂ ಫೆಸ್ತ್ ಆನಿ ಮಾಲ್ಘಡ್ಯಾಂಚೊ ದೀಸ್ ಹಾಚೊ ದೊಡೊ ಸಂಭ್ರಮ್ ಸಕಾಳಿಂ 10.00 ವೊರಾಂಚ್ಯಾ ಮಿಸಾಚ್ಯಾ ಬಲಿದಾನಾಂ ಮುಕಾಂತ್ರ್ ಆಚರಣ್ ಕೆಲೊ. ಸೆಕುಲರ್ ಫ್ರ್ರಾನ್ಸಿಸ್ಕನ್ ಒಡ್ದಿಚೆ ಕರ್ನಾಟಕ ಪ್ರಾಂತ್ಯಾಚೆ ಅತ್ಮಿಕ್ ಸಹಾಯಕ್ ಪ್ರಾಧ್ ಪ್ರಕಾಶ್ ಲೋಬೊಸಂಗಿಂ ಸೆಕುಲರ್ ಪ್ರಾನ್ಸಿಸ್ಕನ್ ಒಡ್ದಿಚ್ಯಾ ಸಾಂದ್ಯಾಂನಿ ಆನಿ ಹಾಜರ್ ಜಾಲ್ಲ್ಯಾ ಸರ್ವ್ ಮಾಲ್ಘಡ್ಯಾಂನಿ ಅರ್ಗಾಂ ಬಲಿದಾನ್ ಭೆಟಯ್ಲೆಂ. ಭಯ್ಣ್ ಸಿಸಿಲಿಯಾ ಸಲ್ಡಾನ್ಹಾ ಹಿಣೆಂ ಸೆಕುಲರ್ ಒಡ್ದಿಚಿ ಆಂಗವ್ಣ್ ಸ್ಟೀಕಾರ್ ಕೆಲಿ ಆನಿ ಭಾವ್ ಕೆನ್ಯುಟ್ ಸಲ್ಡಾನ್ಹಾ, ಆನಿ ರೋಯ್‌ಸ್ಟನ್ ಹಾಂಣಿ ಒಡ್ದಿಚ್ಯೊ ಆಂಗವ್ಣ್ಯೊ ಕೆಲ್ಯೊ.  

ಮಿಸಾ ಉಪ್ರಾಂತ್ ಸಂಭ್ರಮ್ ಹಾಲಾಂತ್ ವೆದಿಂ ಕಾರ್ಯೆಂ  ಮಾಂಡುನ್ ಹಾಡ್‌ಲ್ಲೆಂ. ಹ್ಯಾ ಕಾರ್ಯಾಕ್ ಅಧ್ಯಕ್ಷ್ ಜಾವ್ನ್ ವಿಗಾರ್  ಮಾ| ಬಾ| ಪಾವ್ಲ್ ಪಿಂಟೊ ಆನಿ ಮಾನಾಚೆ ಸಯ್ರೆ ಜಾವ್ನ್ ಬಾಪ್ ಪ್ರಕಾಶ್ ಲೋಬೊ, ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಶ್ರೀಮಾನ್ ಸಂದೀಪ್ ಮಿಸ್ಕಿತ್, ಸೆಕುಲರ್ ಪ್ರಾನ್ಸಿಸ್ಕನ್ ಒಡ್ದಿಚೊ ಅಧ್ಯಕ್ಷ್ ಭಾವ್ ಡೆನಿಸ್ ಫೆರ್ನಾಂಡಿಸ್, ರಾಷ್ಟ್ರೀಯ್ ಸಲಹಾದಾರ್ ಆನಿ ಮಂಗ್ಳುರ್ ಪ್ರಾಂತ್ಯಚೊ ಖಜಾನ್ದಾರ್ ಭಾವ್ ಆಲ್ವಿನ್, ಘಟಕ್ ಅಧ್ಯಕ್ಷ್ ತಶೆಂಚ್ ಪ್ರಾಂತೀಯ್ ಉಪಾಧ್ಯಕ್ಷ್ ಭಾವ್ ವಾಲ್ಟರ್ ಸಲ್ಡಾನ್ಹಾ, ಘಟಕ್ ಕಾರ್ಯದರ್ಶಿ ಭಯ್ಣ್ ರೇಶ್ಮಾ ಪಿರೇರಾ, ಹೋಲಿ ಕ್ರಾಸ್ ಕೊವೆಂತಾಚಿ ಸುಪೀರಿಯರ್ ಸಿಸ್ಟರ್ ಸುಜಾತಾ ಆನಿ ಕಾರ್ಮೆಲ್ ಕೊವೆಂತಾಚಿ ಸುಪೀರಿಯರ್ ಸಿಸ್ಟರ್ ಮೇರಿ ಜೇನ್ ವೆದಿಚೆರ್ ಹಾಜರ್ ಆಸ್‌ಲ್ಲಿಂ.

ಜಮ್ಲೆಲ್ಯಾ ಸರ್ವಾಂಕ್, ಮಾನಾಚೆ ಸಯ್ರ್ಯಾಂಕ್ ತಶೆಂಚ್, ವೊವ್ಳ್ಯಾಂಕ್ ಪಾನ್ ಪೋಡ್ ಉದ್ಕಾ ಸವೆಂ ಸ್ವಾಗತ್ ಕೆಲೆಂ. ಪ್ರಾರ್ಥನ್ ಗಿತಾದ್ವಾರಿಂ ವೆದಿ ಕಾರ್ಯೆಂ ಆರಂಭ್ ಕೆಲೆಂ. ಭಯ್ಣ್ ಶ್ರೀಮತಿ ಬೆನೆಡಿಕ್ಟಾ ಮಚಾದೊನ್ ಸಯ್ರ್ಯಾಂಕ್ ಗುಲೊಬ್ ದೀವ್ನ್ ಸ್ವಾಗತ್ ಕೆಲೆಂ. ಭಯ್ಣ್ ರೇಶ್ಮಾ ಪಿರೇರಾನ್ ಒಡ್ದಿಚಿ ವಾರ್ಷಿಕ್ ವರ್ದಿ ಸಭೆರ್ ದವರ‍್ಲಿ. ಬಾ| ಪ್ರಕಾಶ್ ಲೋಬೊನ್ ಹ್ಯಾ ದಿಸಾಚೆ ಶುಭಾಶಯ್ ಪಾಟಯ್ಲೆ. ವಿಗಾರ್ ಬಾಪಾಂನಿ ಮಾಲ್ಘಡ್ಯಾಂಚ್ಯಾ ದಿಸಾಚೆಂ ಶುಭಾಶಯ್ ಪಾಟವ್ನ್ ಮಾಲ್ಘಡ್ಯಾಂ ಸಾಂಗಾತಾ ಥೊಡೊ ವೇಳ್ ಖರ್ಚುಂಕ್ ಆವ್ಕಾಸ್ ಕರ‍್ನ್ ದಿಲ್ಲ್ಯಾ ಸೆಕುಲರ್ ಫ್ರ್ರಾನ್ಸಿಸ್ಕನ್ ಒಡ್ದಿಚ್ಯಾ ಸಾಂದ್ಯಾಂಕ್ ಶಾಭಾಸ್ಕಿ ಪಾಟಯ್ಲಿ. ಉಪ್ರಾಂತ್ ಸರ್ವ್ ಮಾಲ್ಘಡ್ಯಾಂಕ್ ಮನೋರಂಜನ್ ಕರ್ಚೆ ಖಾತಿರ್ ಒಡ್ಡಿಚ್ಯಾ ಸಾಂದ್ಯಾಂನಿ ನಾಚ್ ತಶೆಂಚ್, ನಾಟ್ಕುಳೊ ಪ್ರದರ್ಶನ್ ಕೆಲೊ. ಭಯ್ಣ್ ರೇಶ್ಮಾ ಪಿರೇರಾನ್ ಸ್ಫೋಟ್ ಗೇಮ್ಸ್ ಮಾಂಡುನ್ ಹಾಡ್ಲೆ ಆನಿ ಇನಾಮಾ ದಿಲಿಂ. ಒಡ್ಡಿಚ್ಯಾ ಸಾಂದ್ಯಾಂನಿ ತಶೆಂಚ್ ಮಾಲ್ಘಡ್ಯಾಂನಿ ಸಾಂಗಾತಾ ಮೆಳೊನ್ ವೊವ್ಯೊ ವೇಸ್, ಪದಾಂ ಗಾವ್ನ್ ತ್ಯಾ ದಿಸಾಚೊ ಸಂತೊಸ್ ದೊಡ್ತೊ ಕೆಲೊ.

ಭಾವ್ ವಾಲ್ಟರ್ ಸಲ್ಡಾನ್ಹಾನ್ ಧನ್ಯವಾದ್ ಪಾಟಯ್ಲೆ. ಸರ್ವ್ ಮಾಲ್ಘಡ್ಯಾಂಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್, ತ್ಯಾ ದಿಸಾಚೊ ಆಚರಣ್ ಆಪ್ಲ್ಯಾ ಜಿಣಿಯೆಂತ್ ಉರ‍್ಚೆ ತಸಲೊ ಕೆಲೊ. ಶ್ರೀಮತಿ ಸೆಲೆಸ್ತಿನ್ ಸಲ್ಡಾನ್ಹಾನ್ ಕಾರ‍್ಯೆಂ ಚಲಯ್ಲೆಂ. ವಿಗಾರ್ ಬಾಪಾಂನಿ ಜೆವ್ಣಾಚೆರ್ ಆಶೀರ್ವಾದ್ ದೀವ್ನ್, ಜೆವ್ಣಾ ಸವೆಂ ಹ್ಯಾ ದಿಸಾಚೆಂ ಕಾರ್ಯೆಂ ಆಕೇರ್ ಕೆಲೆಂ.