NEWS

ಕೊಂಕ್ಣಿ ಮಾನ್ಯತಾ ದಿವಸ್ ಆಚರಣ್

ಆಮ್ಚ್ಯಾ ಫಿರ‍್ಗಜೆಂತ್ ಆಗೋಸ್ತ್ ೧೮ವೆರ್ ಕೊಂಕ್ಣಿ ಮಾನ್ಯತಾ ದಿವಸ್ ಸಾಂ. ಜುಜೆ ಇಂಗ್ಲಿಷ್ ಮಾಧ್ಯಮ್ ಇಸ್ಕೊಲಾಚ್ಯಾ ಸಾಲಾಂತ್ ಭೋವ್ ಗದ್ದಾಳಾಯೆನ್ ಆಚರಣ್ ಕೆಲೊ.

ಪ್ರಾರ್ಥನ್ ನೃತ್ಯಾದ್ವಾರಿಂ ಕಾರ್ಯೆಂ ಸುರ‍್ವಾತ್ಲೆಂ. ವಿಗಾರ್ ಮಾ| ಬಾ| ಪಾವ್ಲ್ ಪಿಂಟೊ, ಮುಕೆಲ್ ಸಯ್ರೆ ಅನಿವಾಸಿ ಉದ್ಯಮಿ ಮಾನೆಸ್ತ್ ಜೋಸೆಫ್ ಮಥಾಯಸ್, ಫಿರ‍್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಮಾನೆಸ್ತ್ ಸಂದೀಪ್ ಮಿಸ್ಕಿತ್, ಕಾರ‍್ಯದರ‍್ಶಿ ಮಾನೆಸ್ತಿಣ್ ಝೀಟಾ ಉಷಾ ಫೆರ್ನಾಂಡಿಸ್, ಸಾಂ. ಜುಜೆ ಇಂಗ್ಲಿಷ್ ಮಾಧ್ಯಮ್ ಇಸ್ಕೊಲಾಚಿ ಆಡಳ್ತ್ಯಾದಾರ್ ಸಿ| ಸುಜಾತಾ, ಕಾರ್ಮೆಲ್ ಆಶ್ರಮ್ ಕೊವೆಂತಾಚಿ ಸುಪೀರಿಯರ್ ಸಿ| ಮೆವಿಸ್ ತಶೆಂಚ್ ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಸಂಚಾಲಕಿ ಸಬಿತಾ ಸಲ್ಡಾನ್ಹಾ ಹಾಂಣಿ ವೆದಿ ಸೊಭಯ್ತೆಚ್ ‘ಕೊಂಕ್ಣಿ ಭಾಸ್, ಸಂಸ್ಕೃತಿ ರುತಾ ಕರ‍್ಯಾಂ, ಎಕ್ವಟಾಚೊ ಕ್ರೀಸ್ತೀ ಸಮುದಾಯ್ ಬಾಂದ್ಯಾಂ’ ಮ್ಹಳ್ಳಿಂ ಉತ್ರಾಂ ಆಟಾಪ್ಚೆಂ ಬ್ಯಾನರ್ ಉಗಡ್ನ್ ಕಾರ‍್ಯೆಂ ಉಗ್ತಾಯ್ಲೆಂ. 

ಮುಕೆಲ್ ಸಯ್ರೊ ಮಾನೆಸ್ತ್ ಜೋಸೆಫ್ ಮಥಾಯಸಾನ್ ಕೊಂಕ್ಣಿ ಭಾಶೆಕ್ ಸಂವಿಧಾನಾಚೆ ಆಟ್ವೆ ವೊಳೆರಿಂತ್ ಮಾನ್ಯತಾ ಮೆಳೊಂಕ್ ವಾವುರ‍್ಲೆಲ್ಯಾ ಸರ‍್ವ್ ಮಾನೆಸ್ತಾಂಚೊ ಉಗ್ಡಾಸ್ ಕಾಡ್ನ್ ತಾಂಚ್ಯಾ ಸೆವೆಕ್ ಶಾಭಾಸ್ಕಿ ಉಚಾರ‍್ಲಿ. ತಶೆಂಚ್ ಸರ‍್ವ್ ಫಿರ‍್ಗಜ್‌ಗಾರಾಂಕ್ ಸಾಂಗಾತಾ ಹಾಡ್ನ್ ಹೆಂ ಕಾರ‍್ಯೆಂ ಮಾಂಡುನ್ ಹಾಡ್‌ಲ್ಲ್ಯಾ ವಿಗಾರ್ ಬಾಪಾಂಕ್, ಗೊವ್ಳಿಕ್ ಪರಿಷದೆಚ್ಯಾ ಸಾಂದ್ಯಾಂಕ್ ತಶೆಂಚ್ ಲ್ಹಾನ್ ಕ್ರಿಸ್ತಾಂವ್ ಕೇಂದ್ರೀಯ್ ಸಮಿತಿಚ್ಯಾ ಸಾಂದ್ಯಾಂಕ್ ಆನಿ ಆಯೋಗಾಚ್ಯಾ ಸಾಂದ್ಯಾಂಕ್ ಅಭಿನಂದನ್ ಪಾಟವ್ನ್ ಅಸಲಿಂಚ್ ಸಬಾರ್ ಕಾರ‍್ಯಿಂ ಮುಕಾರ್‌ಯೀ ಮಾಂಡುನ್ ಹಾಡುಂಕ್ ಉಲೊ ದಿಲೊ.

ಕೊಂಕ್ಣಿ ಸಂಸ್ಕೃತೆಕ್ ಲಗ್ತಿ ಜಾವ್ನ್ ೧೬ ವಾಡ್ಯಾಂಚ್ಯಾ ಸಾಂದ್ಯಾಂನಿ ವಿವಿಧ್ ನಾಚ್, ಪದ್, ನಾಟ್ಕುಳೊ, ಟ್ಯಾಬ್ಲೊ ಪ್ರದರ‍್ಶನ್ ಕರ‍್ನ್ ವಾಡ್ಯಾಚೊ ಎಕ್ವಟ್ ದಾಕಯ್ಲೊ. 

ಮಾನೆಸ್ತಿಣ್ ಶೆರಿನ್ ಡಿಕುನ್ಹಾನ್ ಕಾರ‍್ಯೆಂ ಚಲಯ್ಲೆಂ. ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಸಂದೀಪ್ ಮಿಸ್ಕಿತಾನ್ ಸ್ವಾಗತ್ ಕೆಲೊ, ಕಾರ‍್ಯದರ‍್ಶಿ ಝೀಟಾ ಉಷಾ ಫೆರ್ನಾಂಡಿಸಾನ್ ವಂದಿಲೆಂ. ಸರ‍್ವ್ ವಾಡ್ಯಾಗಾರಾಂನಿ ತಯಾರ್ ಕರ‍್ನ್ ಹಾಡ್‌ಲ್ಲ್ಯೊ ಹಳ್ದಿ ಖೊಲ್ಯಾಚೊ ಪಾತೊಳಿ ಧಾದೊಶಿ ವಾಂಟ್ಲ್ಯೊ. ಅಕ್ರೇಕ್ ಬಾಯ್ಲಾ ಡ್ಯಾನ್ಸಾದ್ವಾರಿಂ ಕಾರ‍್ಯೆಂ ಸಂಪ್ಲೆಂ.