NEWS

ವನಮಹೋತ್ಸವ್ ಆನಿ ಬಾಪಯಾಂಚೊ ದೀಸ್ ಆಚರಣ್

ಕಥೊಲಿಕ್ ಸಭಾ, ನೀರ್ಮಾರ್ಗ್ ಘಟಕಾಚಾ ಸ್ರಿಯಾಂನಿ ಪ್ರಾರ್ಥನಾ ಗೀತ್ ಗಾವ್ನ್ ಕಾರ್ಯಾಕ್ ಸುರ್ವಾತ್ ದಿಲಿ. ಜಮ್ಲೆಲ್ಯಾ ಸಮೆಸ್ತಾಂಕ್ ಕಥೊಲಿಕ್ ಸಭೆಚಿ ಅಧ್ಯಕ್ಷ್   ಶ್ರೀಮತಿ ವಾಯ್ಲೆಟ್ ಸಲ್ಡಾನಾನ್ ಸ್ವಾಗತ್ ಕೆಲೆಂ. ಪ್ರಕೃತಿ- ಸಂಪತ್ತ್, ರೂಕ್ ಝಡಾಂ ಉರೊಂವ್ಚ್ಯಾ ಉದ್ದೇಶಾನ್, ಮಾನಾಚಾ ಸಯ್ರ್ಯಾಂನಿ ಸಾಂಕೇತಿಕ್ ರಿತಿನ್ ಝಡಾಕ್ ಉದಾಕ್ ಘಾಲ್ನ್ ವನಮಹೋತ್ಸವಾಚೆ ಕಾರ್ಯೆಂ ಉದ್ಘಾಟನ್ ಕೆಲೆಂ. 

ಮುಖೆಲ್ ಸಯ್ರೆ ಮಾನೆಸ್ತ್ ಅರುಣ್ ಡಿಸೋಜಾನ್ ವನಮಹೋತ್ಸವಾಚೊ ಮುಖ್ಯ್ ಉದ್ದೇಶ್ ಕಿತೆಂ ಮ್ಹಣುನ್ ಸಂಕ್ಷಿಪ್ತ್ ರಿತಿನ್ ಸಮ್ಜಯ್ಲೆಂ. ತಶೆಂಚ್ ಬಾಪಾಯಾಂಚಾ ದಿಸಾಕ್ ಲಗ್ತಿ ಜಾವ್ನ್ ಎಕ್ ಕವನ್ ವರ್ಣುಂಚೆದ್ವಾರಿ ಆಪ್ಲ್ಯಾ ಭುರ್ಗ್ಯಾಂಚಾ ವಾಡಾವಾಳಿಂತ್ ಬಾಪಯ್ ಕಶೆಂ ಪಾತ್ರ್ ಘೆತಾತ್ ಆನಿ ತಾಂಚೊ ಸ್ಥಾನ್ ಕಸೊ ಮ್ಹಣುನ್ ಕಳಯ್ಲೆಂ.ಕಾರ್ಯಾಚೆ ಅಧ್ಯಕ್ಷ್ ಮಾನಾಧಿಕ್ ಬಾಪ್ ಪಾವ್ಲ್ ಪಿಂಟೊ ಹಾಣಿಂ ಪಯ್ಲ್ಯಾನ್ ಪಯ್ಲೆಂ ದೊಡ್ತ್ಯಾ ಸಂಭ್ರಮಾಕ್ ಉಲ್ಲಾಸ್ ಪಾಟಯ್ಲೊ ಆನಿ ಮುಕಾರಿಯೀ ಅಸಲಿಂ ಕಾರ್ಯಕ್ರಮಾಂ ಮಾಂಡುನ್ ಹಾಡುಂಕು ಜಾಯ್ ಮ್ಹಣ್ ತಿಳ್ಸಿಲೆಂ ತಶೆಂಚ್ ತಾಂಚೊ ಪಾಟಿಂಬೊ ಭಾಸಾಯ್ಲೊ.  ಮಾನೆಸ್ತ್ ವಾಲ್ಟರ್ ಸಲ್ಡಾನಾನ್ ವನಮಹೋತ್ಸವಾಚೆ ಪ್ರಾಮುಖ್ಯತಾ ಸಮ್ಜುನ್ ಝಡಾಂ ಕಶೆಂ ಲಾಂವ್ಚಿ, ಕೃಷಿ ಕಶೆಂ ಕರ್ಚೆಂವಿಶಿ ಮಾಹೆತ್ ದಿಲಿ ಆನಿ ತಾಂಕಾಂ ಸಂಪರ್ಕ್ ಕರ್ನ್ ಚಡಿತ್ ವಿವರ್ ದಿತೆಲೆ ಮ್ಹಣುನ್ ಭಾಸಾಯ್ಲೆಂ. 

ಸ್ತ್ರೀಯಾಂನಿ ಬಾಪಾಂಯಾಂಚಾ ದಿಸಾಚೆ ಆಚರಣ್ ಜಾವ್ನ್ ಸಾಂಗಾಂತಾ ಮೆಳೊನ್ ಥೊಡೆ ಮನೋರಂಜನ್ ಕಾರ್ಯಕ್ರಮ್ ಮಾಂಡುನ್ ಹಾಡ್ಲೆ. ಬಾಪಾಯಾಂಕ್ ಉಲ್ಲಾಸುನ್ ಗೀತ್ ಗಾಯ್ಲೆಂ. ಶ್ರೀಮತಿ ಮರ್ಲಿನ್ ಪಾಯ್ಸಾನ್ ಥೊಡೆ ಮನೋರಂಜನ್ ಖೆಳ್ ಚಲವ್ನ್ ವೆಲೆ. ಬೈಲಾ ನಾಚ್ ತಶೆಂಚ್ "ರೊಬಿನಾಕ್ ಸೈರಿಕ್" ಮ್ಹಳ್ಳೊ ಹಾಸ್ಯ್ ನಾಟಕ್ ಪ್ರದರ್ಶನ್ ಕೆಲೊ. ಜಿಕ್‌ಲ್ಲ್ಯಾಂಕ್ ಇನಾಮಾಂ ವಾಂಟ್ಲಿ. ಸಂಭ್ರಮಾಕ್ ಹಾಜರ್ ಜಾಲ್ಲ್ಯಾ ಸರ್ವಾಂಕ್ ಶ್ರೀಮತಿ ಫ಼್ಲಾವಿಯ ಡಿ’ಸೋಜಾನ್ ಧನ್ಯವಾದ್ ಪಾಟಯ್ಲೊ. ಸಮೆಸ್ತಾಂಕ್ ಉಡಾಸಾಚಿ ಕಾಣಿಕ್ ವಾಂಟ್ಲಿ. ಸಮೆಸ್ತಾಂಚಾ ತರ್ಫ಼ೆನ್ ಶ್ರೀಮಾನ್ ಫ಼್ರಾನ್ಸಿಸ್ ಗೊನ್ಸಾಲ್ವೀಸಾನ್ ಸ್ರೀಯಾಂನಿ ಸಾಂಗಾತಾ ಮೆಳೊನ್ ಮಾಂಡುನ್ ಹಾಡ್‌ಲ್ಲ್ಯಾ ಕಾರ್ಯಕ್ರಮಾ ವಿಶ್ಯಾಂತ್ ಹೊಗ್ಳಿಕ್ ಉಚಾರ್ಲಿ. ಶ್ರೀಮತಿ  ಶರೀನ್ ಫ಼ಲ್ಲೇರಾನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ. ಕಾಫ಼ಿ-ಫ಼ಳಾರಾ ಸಂಗಿಂ ಕಾರ್ಯೆಂ ಸಂಪಯ್ಲೆಂ. ಕಾರ್ಯಾಕ್ ಸುಮಾರ್ 150 ಲೋಕ್ ಹಾಜರ್ ಆಸ್‌ಲ್ಲೊ.